स्वन्हुया न्हि नं नेप्से क्वय्
येँ (सन्ध्या टाइम्स)/स्टक एक्सचेन्जया शेयर कारोबारं लगातार स्वन्हुया न्हि कुन्हु नं बजार परिसचक नेप्से कुहां वंगु दु। थ्व वाःया आइतवाः निसें कुहां वनेगु शुरु जूगु बजार परिसुचक म्हिगः नं कुहां वनेवं स्वन्हुया दुने १३ अंकं कुहां वंगु दु। बजाः चाःगु छं ई तक सामान्य स्थितिइ लानाच्वंगु नेप्से वयां लिपा सामान्य अंकं थहां वनेधुकूग खःसा वयां लिपा हाकनं कुहां वनेगु क्रमं निरन्तरता काःगु खः। नेप्से कुहां वयेगु क्रमय् नं तःक्वःमछिं सामान्य अंकं थहां कुहां जयाच्वंगु खः ।
नेपाल स्टक एक्सचेन्जया कथं म्हिगःया कारोबारं दक्वं समुहया परिसुचक कुहां वःगुलिं थुकिया लिच्वः शेयर बजारय् लाःग खः। म्हिगः बजार परिसुचक नेप्से ३ दशमलव ९४ अंकं कुहां वनाः ५३६ दशमलव १८ अंकय् थ्यंगु दु। अथे हे सेन्सेटिभ १ दशमलव २३ अंकं कुहां वयाः १३१ दशमलव ५१ अंकय् थ्यंगु दु। फ्लोट शुन्य दशमलव ३९ अंकं कुहां वनाः ५० दशमलव ९७ अंकय् थ्यन ।
म्हिगः नं कारोबार जूगु परिसुचकया लिसें दक्वं समुहया उपसुचक नं कुहां वःगु दु। कारोबार जूगु समुहया उपसुचक कुहां वयेगु क्रमय् वाणिज्य समुह ६ दशमलव ३८ अंकं कुहां वनाः ५११ दशमलव ९९ अंकय् थ्यन। विकास बैंक समुहया कारोबार सुचक शुन्य दशमलव ९३ अंकं कुहां वयाः ५९२ दशमलव ९९ अंकय् थ्यंगु दु। जलविद्युत समुहया सुचक ३ दशमलव शुन्य ९ अंकं कुहां वयेवं ८०३ दशमलव ३२ अंकय् थ्यन। फाइनान्स समुहया कारोबार सुचक नं शन्य दशमलवव ८७ अंकं कुहां वनाः ५४२ दशमलव ४३ अंकय् थ्यंगु दु। वीमा समुह व अन्य समुहया सुचक धाःसा यथावत हे कायम जुल ।
शेयर बजारय् छन्हु न्ह्यः स्वयां अप्वः शेयर न्याये-मी जूसां दांया कारोबारय् धाःसा अझं सन्तुष्टिगत रुपं सुधार जुइ फयाच्वंग मदुनि। थ्व कुन्हु शेयर बजारय् न्यय्प्यंगू कम्पनीया ग्वीनिद्वः गुसः व चय्न्हय्गू कित्ता शेयर न्याये-मी जुयाः प्यंगू करोड ख्वीगुंगू लख स्वीन्याद्वः तका दांया कारोबार जूगु दु। छन्हु न्ह्यः ख्वीनिगू कम्पनीया ख्वीछद्वः व न्यासः व नीखुग कित्ता शेयर न्याये-मी जुयाः निगू करोड ग्वीछगू लख स्वीगुद्वः तका दांया कारोबार जूगु खः। थुगु कारोबार वंग छुं दिं न्ह्यः थुखेया दकलय् म्हो कारोबार खः।
कारोबार जूगु कम्पनीमध्ये झिंप्यंगू कम्पनीया शेयर भाः थहां वंगु दुसा नीच्यागू कम्पनीया शेयर भाः कुहां वःगु दु। अथे हे झिंछग कम्पनीया शेयर भाः यथावत कायम जुल ।
