'विद्रोह याःसाः माओवादी लिट्टे थें जुइ'
प्रधानमन्त्री माधवकुमार नेपालं जंगली पह सुधार मयासें हानं विद्रोहलय् वंसाः माओवादी थःहे सिधइगु ख्याच्वः बियादीगु दु । वयेकलं माओवादीं इलय्ब्यलय् धम्कीपूर्ण भासं विद्रोह याये धइगु उमिगु हे पतनया शुरुवात जूगु नं दाबी यानादिल ।
बिहीवाः भरतपुरय् ग्वसाःग्वःगु भेलाय् एमाले कार्यकर्तायात सम्बोधन यानादिसें वयेकलं माओवादीया विद्रोहं श्रीलंकाया टमिल टाईगर लिट्टेयात थें थःपिंसं हे सिध्येकीगु धयादिल । बिद्रोहया लँपूइ माओवादी मवनेमाः धइगु दक्वसियां इनाप जूगु धयादिसें प्रधानमन्त्री नेपालं माओवादीया व्यवहार व नेतातय् धापू पाखें लिट्टेया हे लँपू पाखें पतन जुइगु खलाः धइगु आशंका ब्वलंकूगु धयादिल ।
सरकार परिवर्तन व सत्ता प्राप्त यायेत विधिया लँपू नालेमाःगु खँय् बः बियादिसें वयेकलं विधि पालना मयाइगु दल, पुचः व मोर्चा हनिमय् पाखें हे तनावंगु धयादिल । वयेकलं माओवादीं नं थःपिंत राजनीतिक चरित्र, विधिया प्रकृयाय् समाहित मयासाः मेमेगू विद्रोही पुचःया थें हालत जुइगु धयादिल ।
अथेहे चितवनया सौराहालय साप्ताहिक पाक्षिक पत्रिका संजालया केन्द्रीय भेलाया उल्लेज्या यायेत भरतपुर विमानस्थल थ्यंकादिम्ह प्रधानमन्त्री नेपालयात विमानस्थल पिने माओवादी कार्यकर्तातय्सं हाकूगु ध्वाँय् क्यनेगु नापं प्रधानमन्त्री सवार गाडीइ अप्पां क्येकूगु खः ।
