बसया ठक्करं छम्ह सीवं कालिमाटीलय् तनाव

येँया कालिकाटीइ बिहीवाः सुथय् झिछताः इलय् मिनी बसया ठक्करं छम्ह सीवं उगु क्षेत्र तनावग्रस्त जूगु दु । बा. २. ख. ६७२९ नम्बरया मिनी बसं कालिमाटी सतकय् न्यासीवनाच्वंम्ह च्ययेप्यदँया गणेशमाया महर्जनयात ठक्कर बिवं वयेक घटनास्थलय् हे सीगु खः ।

स्थानीय मनूतय्सं मिनी बसं महर्जनयात छ्योनय् क्यलाः स्याःगु धासें छुं ई विरोध प्रदर्शन याःगु खः । लिपाः सुरक्षाकर्मीतय् उपस्थिति अप्वयेकेवं तनाव म्हो जूगु खः ।

मिनी बस व उकीया चालकयात नियन्त्रणय् कयाः आः महानगरीय प्रहरी बृत्त कालिमाटीलय् तयातःगु दु । महर्जनया छेँजःपिंसं गाडी चालकयात कारवाही यायेमाःगु माग यासें प्रहरीलय् जाहेरी ब्यूगु दु ।

महर्जनया सीम्हयात पोस्टमार्टमयात शिक्षण अस्पताल महाराजगंजय् यंकूगु दु ।