माओवादी कार्यकर्तायात गोलीं क्येका: स्यात
बारा,पर्सा ,रौतहट बन्दया आह्वान
बाराया गंजभवानीपुरय् बुधवाः बहनी झिताः इलय् अज्ञात पुचलं अत्याधुनिक ल्वाभः पाखें न्ह्यनलाथें गोली क्येकेवं एनेकपा (माओवादी)या भोजपुरा राज्य कमिटीया दुजः सहित स्वम्ह कार्यकर्ता सीगु दुसाः निम्ह गम्भीर घाःपाः जूगु दु ।
घटनाया विरोधय् माओवादीं बिहीवाः बारा, पर्सा व रौतहट जिल्ला बन्दया आह्वान याःगु दु । अथेहे हत्याया विरोधय् माओवादीं बिहीवाःया व्यवस्थापिका संसदया बैठक बहिष्कार याःगु दु ।
घटनाय् लानाः भोजपुरा राज्य कमिटीया दुजः स्वीन्यादँया रामप्रकाश यादव, माओवादी कार्यकर्तात नीन्हय्दँया अम्बिका महतो व नीच्यादँया दारा यादव सीगु खः । अथेहे माओवादीया क्षेत्रीय सेक्रेटरी कन्हैया व सियाराम कुशवाहा गम्भीर घाःपाः जूगु दु ।
अनया छगू गांमाय् चिमनी भट्टाया उल्लेज्याया अवसरय् भोय् नयाच्वंगु इलय् च्याम्ह झिम्हया पुचलं गोलीं क्येकूगु खः । घटन स्थल सदरमुकाम कलैयापाखें प्यंगु किलोमिटर पूर्वय् लाः ।
