प्रचण्डया नेतृत्वय् राष्ट्रिय सरकार असम्भव : सुशील
माओवादी संविधान निर्माण यायेत गैर जिम्मेवार : देउवा
नेपाली कांग्रेसया कार्यवहाक सभापति सुशील कोइरालां माओवादी अध्यक्ष पुष्पकमल दाहाल प्रचण्डया नेतृत्वय् राष्ट्रिय सरकार गठन जुइमफइगु खँ धयादीगु दु ।
प्रेस युनियन बारां बुधवाः कलैयाय् ग्वसाःग्वःगु पत्रकार सम्मेलनय् वयेकलं वर्तमान सरकार हे बहुमतया सरकार जूगुलिं दक्वं थुकी हे वयेमाःगु धयादिल । वयेकलं माओवादीयात नं वर्तमान सरकारय् वयेत इनाप यानादिल ।
वयेकलं उपप्रधानमन्त्री सुजाता कोइरालां संघीयताया बारे ब्यूगु अभिव्यक्ति व्यत्तिगत जूगु धयादिसें उगु बिचाः पार्टीया आधिकारिक धारणा मजूगु धयादिल ।
अथेहे महेन्द्रनगरय् पार्टीया मदुम्ह नेता व पुलांम्ह सांसद दुर्गादत्त जोशीया शोकसभाय् न्ववानादिसें कांग्रेस वरिष्ठ नेता शेरबहादुर देउवां माओवादीं संविधान निर्माण यायेगु ज्याय् गैर जिम्मेवार जूगु द्वपं बियादिल ।
वयेकलं माओवादीं देशय् अराजकता व वितण्ड ब्वलंकूगु कारणं परिस्थिति नाजुक जूगु धयादिसें डर व त्रास मुक्त मजुतल्ले देशया भविष्य मदुगु धयादिल । वयेकलं माओवादीया थंज्याःगु पहलं हे उपिं संविधान निर्माण प्रति गैर जिम्मेवार जूगु पुष्टि जूगु दाबी यानादिल । नापं वयेकलं संघीय राज्यया स्वरुपया निर्णय माओवादीं एकतर्फी रुपं याःगुलिं नं उपिं संविधान निर्माण याये चाहे मजूगु धयादिल ।
