दलत दथुइ उच्चस्तरीय राजनीतिक संयन्त्र गठन यायेगु सहमित
प्रमुख स्वंगू दलया शीर्ष नेतात दथुइ वइगु शुक्रवाः उच्चस्तरीय राजनीतिक संयन्त्र गठन यायेगु सहमति जूगु दु ।
तःधंगु मुख्य स्वंगू दलया शीर्ष नेतातय् बैठकय् कांग्रेस सभापति गिरिजाप्रसाद कोइरालां तयादीगु थुगु प्रस्तावय् मेगू दलया नेतातय्सं समर्थन याःगु खः । कोइरालां संयन्त्र देयेकाः समस्याया समाधान यायेगु प्रस्ताव तयादीगु खः ।
राजनीतिक गतिरोध चीकेगु निंतिं सहलह यायेत कोइराला निवास महाराजगंजय् जूगु खँल्हाबंलाय् शुक्रवाःया दुने स्वंगूलिं दलं थःथःगु दल दुने उच्चस्तरीय संयन्त्रया बारे सहलह यायेगु व शुक्रवाः थुगु संयन्त्र गठन यायेगु सहमति जूगु खँ एमाले अध्यक्ष झलनाथ खनालं कनादिल ।
मंगलवाः होटेल अन्नपूर्णय् च्वंगु स्वंगू दलया बैठकं थौं कांग्रेस सभापति कोइराला व प्रधानमन्त्री माधवकुमार नेपालया उपस्थिति स्वंगू दलया बैठक च्वनेगु निर्णय याःगु खः । तर प्रधानमन्त्री नेपाल बैठक क्वचायेधुंकाः जक थ्यंगुलिं वयेकलं राजनीतिक गतिरोध व समसामयिक अवस्थाया बारे कांग्रेस सभापति कोइराला नाप जक खँल्हाबंला यानादीगु खः ।
उच्चस्तरीय संयन्त्र गठन लिपाः न्हापा हे स्वंगू दलया बैठकय् न्ह्यब्वःगु खुगू बुँदे एजेण्डा, सरकार व माओवादी दथुइया झिंनिगू बुँदे सहमतिया समिक्षा, दलत दथुइया विश्वासया वातावरण निर्माण, राष्ट्रपतिया पलाः, सेना समायोजन लगायत विषय उगु हे संयन्त्र मार्फत समाधान मालीगु जूगु दु ।
बैठकय् कांग्रेस, माओवादी व एमालेया शीर्ष नेतात गिरिजाप्रसाद कोइराला, पुष्पकमल दाहाल 'प्रचण्ड', झलनाथ खनाल लगायतया ब्वति दुगु खः ।
