'इलय् हे संविधान निर्माण यायेत पहल यानादिसं'
नेपाल विद्यार्थी संघं इलय् हे संविधान निर्माणया निंतिं पहल यानाबीत नेकपा (एमाले)या अध्यक्ष झलनाथ खनालयात इनाप याःगु दु ।
जनादेश बमोजिम संविधान निर्धारित इलय् हे च्वयेत दवाव बूगु अभियान अन्तर्गत एमाले मुख्यालय बल्खुइ वनाः नेवि संघया प्रतिनिधि मण्डलं उगु दवाव ब्यूगु खः । संघया अध्यक्ष प्रदीप पौडेलया नेतृत्व वंगु प्रतिनिधिमण्डलं दलत दथुइ आपसी विश्वासया वातावरण, सहकार्य व एकताया भावनायात केन्द्रय् तयाः संविधान निर्माण व शान्ति प्रकृयायात तार्किक निष्कर्षय् थ्यंकाः देशय् राजनीतिक स्थायित्वया नेतृत्व यायेत अध्यक्ष खनालयात इनाप याःगु खः ।
अध्यक्ष खनालं थःगु पार्टी शान्ति प्रकृया व संविधान च्वयेगु ज्याय् प्रतिबद्ध जूगु स्पष्ट यानादिसें माओवादीयात अराजक गतिविधि त्वःताः शान्ति प्रकृया व संविधान च्वयेगु ज्याय् इमान्दार जुइत इनाप यानादिल ।
