माओवादी पाखें शान्ति समितिया भेला बहिष्कार
एनेकपा (माओवादीं) शान्ति समितिया प्रतिनिधितय् भेला बहिष्कार याःगु दु । थःगु दलयात बाइपास यानाः एकपक्षीय रुपं शान्ति समितित गठन याःगु धासें शान्ति समितिलय् दुपिं माओवादी प्रतिनिधितय्सं बुधवाःया भेला बहिष्कार याःगु खः ।
पश्चिमाञ्चल विकासया दक्वं व मध्यामाञ्चल विकास क्षेत्रया झिंनिगू जिल्ला यानाः नीच्यागू जिल्लाया स्थानीय शान्ति समितिया संयोजक, मिसाः दुज छम्ह व ज्याकूया सचिवतय् निंतिं येँय् याःगु निन्हुया अन्तरक्रिया ज्याझ्वः माओवादीं बहिष्कार याःगु खः ।
उगु ज्याझ्वःया उल्लेज्या यानादिसें शान्ति मन्त्री रकम चेम्जोङं दक्वं जिल्लाया शान्ति समिति समावेशी आधारय् उच्चस्तरीय राजनीतिक सहमति पाखें गठन याःगुलिं थुकीया गठनय् सरकारया छुं भूमिका मदुगु धयादिल ।
मन्त्री चम्जोङं न्ववायेगु ई तक ज्याझ्वलय् उपस्थित माओवादी प्रतिनिधितय्सं मन्त्रीं न्ववायेवं थःपिं प्रमुख प्रतिपक्षीया भूमिका निर्वाह यानाच्वंगु इलयय् नं माओवादीया अस्तित्वयात स्वकार मयाःगु धासें ज्याझ्वः बहिष्कार याःगु खः ।
