याकनं हे राष्ट्रिय सरकार : यादव
मधेशी जनअधिकार फोरमया अध्यक्ष उपेन्द्र यादवं नेकपा (एमाले) नेतृत्वया वर्तमान सरकार क्वदलाः याकनं हे राष्ट्रिय सहमतिया सरकार गठन जुइगु दाबी यानादीगु दु ।
बुधवाः येँ जूगु छगू साक्षात्कार ज्याझ्वलय् न्ववानादिसें वयेकलं वर्तमान सरकार क्वदलीगु सूचं थम्ह न्यानाःगु व याकनं हे संविधानसभाय् दुथ्याःगु दक्वं दल दुगु राष्ट्रिय स्वरुपया सरकार गठन जुइगु धयादिल । वयेकलं आगामी सत्तासाझेदारी संविधानसभाय् प्राप्त मतया आधरय् जुइगु नं धयादिल । नापं वयेकलं न्हूगु सरकारय् धाःसाः बूपिंसं नेतृत्व यायेमदइगु नं धयादिल ।
अथेहे यादवं उपप्रधानमन्त्री सुजाता कोइरालया संघीयताय् वने न्ह्यः जनमत संग्रह यायेमाःगु बिचाः प्रति आपत्ति प्वंकादिल । वयेकलं उपप्रधानमन्त्री कोइरालया धापू बारे आधिकारिक धारणा बीत कांग्रेसयात इनाप यानादिल । वयेकलं सुजाताया धापू पाखें कांग्रेस नं जुजुवादी राप्रपा नेपालया कित्ताय् थ्यंगु टिप्पणी यानादिल ।
