सत्तारुढ दलया सभासद् पाखें हे उपप्रमया राजीनामा माग
सत्तारुढ दलया सभासद्त पाखें हे संघीयता विरुद्ध अभिव्यक्ति बियादीम्ह उपप्रधानमन्त्री सुजाता कोइरालाया राजीनामा माग याःग दु ।
व्यवस्थापिका संसदया मंगलवाः च्वंगु बैठकय् विशषे ई कयाः न्ववासें सत्तारुढ नेकपा (एमाले), मधेशी जनअधिकार फोरम (लोकतान्त्रिक), तमलोपा, सद्भावना (आनन्दीदेवी) नापं प्रमुख प्रतिपक्षी दल एनेकपा (माओवादीं) नं कोइरालाया राजीनामा माग याःगु खः ।
बैठकय् न्ववानादिसें एमाले सभासद् लालबाबु पण्डितं उपप्रम कोइरालां पुलांम्ह जुजुं थें संघीयता विरोधी अभिव्यक्ति ब्यूगु धयादिल । वयेकलं कोइरालां संघीयताया बारे बांलागु पक्षय् मस्यूगु धयादिसें वयेकयात पदं चीकाः जर्मनीलय् संघीयताया बारे अध्ययन यायेत छ्वयेमाःगु बिचाः प्वंकादिल ।
अथेहे माओवादीया सभासद् रामकुमार शर्मां संघीयता विरुद्ध न्ववाम्ह कोइरालायात पदय् च्वनाच्वनीगु अधिकार मदुगु धयादिल । फोरम लोकतान्त्रिकया नीलम बर्मा, तमलोपाया वसन्ती झा, सुनितादेवी यादव व सद्भावनाया सरिता गिरिं नं कोइरालाया राजनीमा माग याःगु खः ।
राप्रपा नेपालया चन्द्रबहादुर गुरुङ व राष्ट्रिय जनमोर्चाया चित्रबहादुर केसीं धाःसाः उपप्रधानमन्त्रीया संघीयता विरोधी धापूया समर्थन यानादिसें संघीयताया समर्थन याःथें उकीया विरुद्ध न्ववायेगु नं अधिकार दु धयादिल ।
