शीर्ष नेतातय् बैठक बुधवाः हानं च्वनीगु
राजनीतिक गतिरोध क्वचायेकेगु उपाय मालेत च्वंगु स्वंगू प्रमुख दलया शीर्ष नेतातय् बैठक बुधवाः हानं च्वनीगु जूगु दु । बुधवाः च्वनीगु बैठकय् प्रधानमन्त्री माधवकुमार नेपाल सहित शीर्ष नेतातय् बैठक च्वनीगु निर्णय याःगु दु ।
होटल अन्नपूर्ण मंगलवाः च्वंगु बैठकं कन्हय् च्वनीगु बैठकय् प्रधानमन्त्री नेपाल व नेपाली कांग्रेसया सभापति गिरिजाप्रसाद कोइराला सहितया शीर्ष नेतातय् बैठक च्वनीगु निर्णय याःगु खः । अथेहे मंगलवाःया बैठकय् थ्वस्वयां न्ह्यः तय याःगु खुगू बुँदाय् सहलह जूगु खः । नापं बैठकय् न्हापाया सहमतिया समीक्षा, राष्ट्रपतिया पलाः, सेनाया लोकतान्त्रिकरण, विस्तृत शान्ति सम्झौता कार्यान्वयन, संविधान संशोधन लगयातया विषयलय् सहलह जूगु खः ।
बैठकय् एनेकपा (माओवादी)या अध्यक्ष पुष्पकमल दाहाल 'प्रचण्ड', उपाध्यक्षत डा. बाबुराम भट्टराई व नारायणकाजी श्रेष्ठ 'प्रकाश' नेपाली कांग्रेसया उपसभापति रामचन्द्र पौडेल, नेता डा. रामशरण महत व कृष्णप्रसाद सिटौला व नेकपा (एमाले)या पाखें अध्यक्ष झलनाथ खनाल, गृहमन्त्री भीम रावल व संसदीय दलया प्रमुख सचेतक भीम आचार्यया उपस्थिति दुगु खः ।
