माओवादी पाखें प्यंगूगु चरणया आन्दोलन सार्वजनिक
राष्ट्रिय स्वाधीनतयायात न्हापांगु प्राथमिकताय् तयाः एनेकपा (माओवादीं) प्यंगूगु चरणया आन्दोलन सार्वजनिक याःगु दु । माओवादीं प्यक्वःगु आन्दोलनया झ्वलय् भारत पाखें नेपाःया सीमा अतिक्रमण याःगु क्षेत्रय् सभा यायेगु नापं भारतीय दूतावास व सिंहदरवार न्ह्यने प्रदर्शन यायेगु तकं दु ।
ओन्दोलनया झ्वलय् पुस २७ गते भारत पाखें सीमा अतिक्रमित क्षेत्रय् शीर्ष नेतातय् भ्रमण व सभा यायेगु ज्याझ्वः माओवादीं देयेकूगु दु । भारत पाखें अतिक्रमित महाकालीलय् अध्यक्ष पुष्पकमल दाहाल 'प्रचण्ड', पशुपतिनगरय् वरिष्ठ उपाध्यक्ष मोहन वैद्य 'किरण', सुस्ताय् उपाध्यक्ष डा. बाबुराम भट्टराई, लक्ष्मणपुर बाँधय् मेम्ह उपाध्यक्ष नारायणकाजी श्रेष्ठ 'प्रकाश' व खुर्दलोटन बाँधय् महासचिव रामबहादुर थापां सभायात सम्बोधन याइगु ज्याझ्वः दु ।
आन्दोलनया हे झ्वलय् पुस ३० गते भारत नाप सन् १९५०य् जूगु लगायत असमान सन्धि सम्झौता देयन्यंक च्याकीगु दु । वस्वयां न्ह्यः २६ गते तक प्रचार प्रसार, भित्ते लेखन, अन्तरक्रिया आदि यायेगु दु ।
२३ गते निसें २६ गते तक देय्या प्रमुख सहरय् सभा यायेगु व उकीयात शीर्ष नेतातय्सं सम्बोधन याइ । अथेहे पुस २५ गते निसें माघ १० गते तक प्रचार सामाग्री इनेगु, भित्ते लेखन, सांस्कृतिक ज्याझ्वः, साहित्यिक ज्याझ्वः, मार्च, पत्रकार सम्मेलन, सीमा प्रभावित क्षेत्रया अवलोकन, सभा, कोणसभा आदि अभियानात्मक ज्याझ्वः यायेगु ज्याझ्वः दु ।
माघ ५ निसें १० गते तक माओवादीं स्वंगूगु चरणया आन्दोलनया झ्वलय् घोषणा याःगु गणराज्यलय् सभा यायेगु व उकी शीर्ष नेतातय्सं सम्बोधन याइगु ज्याझ्वः दु ।
अथेहे प्यंगूगु चरणया लिप्पांगु ज्याझ्वः कथं सिंहदरवार व भारतीय राजदूतावास न्ह्यने विरोध प्रदर्शन यायेगु खँ माओवादीं धाःगु दु ।
