'भारतीय सेनाध्यक्षया धापूयात ब्यक्वयेकल'
नेपाः स्थित भारतीय राजदूतावासं माओवादी लडाकूया समायोजन सम्बन्धय् भारतीय सेनाध्यक्ष दीपक कपुरं प्वंकूगु अभिव्यक्तियात संचार माध्यमं ब्यक्वयेकाः पिथंगु द्वपं ब्यूगु दु । भारतीय दूतावासं सोमवाः छगू वक्तव्य पिथना कपुरया धापू धकाः प्रचार याःगु धापू भारत सरकारया मजूगु खँ नं धाःगु दु ।
प्रमुख प्रतिपक्षी दल एकीकृत नेकपा (माओवादीं) भारतीय सेनाध्यक्ष कपुरया धापूयात सार्वजनिक विरोध व माओवादी अध्यक्ष पुष्पकमल दाहाल 'प्रचण्डं' भारतीय राजदूत राकेश सुदनाप थुकी बारे जानकारी फ्वनेवं दूतावसं वक्तव्य मार्फत सोमवाः खण्डन याःगु खः ।
वक्तव्यय् भारतीय सेनाध्यक्ष कपूरं नेपाली सेनाय् माओवादी लडाकूत समायोजन सम्बन्धय् प्वंकूगु बिचाःयात संचार माध्यमं पूर्णरुपं ब्यक्वयेकाः पिथंगुलि थःपिनिगु ध्यान आकर्षण जूगु खँ न्ह्यथंनातःगु दु । अथेहे उकी कपुरया धापू पाखें भारत सरकारया आधिकारिक धारणाया प्रतिबिम्ब मयाइगु नं न्ह्यथंनातःगु दु ।
थुकीया बारे छुं राजनीतिक दलतय्सं नियतबस तोडमोड यानाः भारयात विवादय् सालाकायेत स्वःगु दुःखदायी खँ जूगु धासें निगू देय्या मैत्री सम्बन्धयात जगेर्ना यासें भारतीय व नेपाःमि दथुइया ताःहाकःगु संस्थागत व सतिगु सैनिक व रक्षा स्वापू कायम हे जुयाच्वनीगु खँ नं वक्तव्यय् न्ह्यथंनातःगु दु ।
नेपाली सेनाया प्रधानसेनापति छत्रमान गुरुङ भारत भ्रमणय् झायादीगु इलय् भारतीय सेनाध्यक्ष कपुरं नेपाली सेनायात गैरराजनीतिक चरित्रय् तयातयेत लडाकूतय् सामुहिक समायोजन यायेमज्यू धका: प्वंकूगु अभिव्यक्ति बारे बुखँ सार्वजनीक जूगु ख: ।
