उपप्रमया अभिव्यक्ति प्रति संसदय् प्रमया स्पष्टिकरण माग
सभासद्तय्सं उपप्रधानमन्त्री सुजाता कोइरालां संघीयता विरुद्ध ब्यूगु अभिव्यक्ति प्रति प्रधानमन्त्री माधवकुमार नेपालं संसदय् स्पष्टिकरण बीमाःगु माग याःगु दु ।
सोमवाः च्वंगु संसदया बैठकय् न्ववानादिसें सभासद् हरि रोकां जिम्मेवार उपप्रधानमन्त्रीं ब्यूगु अभिव्यक्ति व्यक्तिगत जुइमफइगु धयादिसें थुकीया बारे तत्काल प्रधानमन्त्रीं स्पष्टिकरण बीमाःगु खँ धायादिल । अथेहे एमालेया सभासद् रविन्द्र अधकारीं नं उपप्रधानमन्त्रीया अभिव्यक्ति संविधानया मर्म विपरित जूगु टिप्पणी यानादिल । वयेकलं माओवादीं याःगु गणराज्य घोषणां संविधानसभाया मानमर्दन याःगु नं धयादिल ।
अथेहे माओवादीया सभासद् दामा शर्मा, मधेशी जनअधिकार फोरमया सभासद् अभिषेकप्रताप साह, सद्भावनाया अनिलकुमार झा लगायतं नं उपप्रधानमन्त्री कोइरालाया अभियब्यक्ति प्रति आपक्ति प्वंकूसें थुकीया बारे प्रधानमन्त्रीं संसदय् स्पष्टिकरण बीमाःगु माग याःगु खः ।
वंगु शनिवाः येँ जूगु छगू ज्याझ्वलय् उपप्रधानमन्त्री कोइरालां संघीयताय् वने न्ह्यः जनमत संग्रह यानाः जक मवंगुलिं दलतय्सं गल्ती याःगु खँ धयादीगु खः । थुकीया बारे आइतवाः संवैधानिक समितिया बैठकय् नं सभासद्तय्सं विरोध यायेवं प्रधानमन्त्री नेपालं थ्व उपप्रधानन्त्री कोइरालाया व्यक्तिगत धापू जूगु खँ धयादीगु खः ।
