'मां भाय् मेपिंसं किटान यायेगु मखु'
तराई मधेश लोकतान्त्रिक पार्टीया उपाध्यक्ष वृषेशचन्द्र लालं निष्कृय उपराष्ट्रपति परमानन्द झाया मां भाय् मेपिंसं किटान याः कथं मजुइगु खँ धयादीगु दु ।
येँ सोमवाः जूगु छगू साक्षात्कार ज्याझ्वलय् न्ववानादिसें लालं व्यवस्थापिकाय् न्ह्यब्वःगु अन्तरिम संविधानय् न्हय्क्वःगु संशोधन विद्येयकयात लोकतन्त्रया संस्थागत विकासय् महत्वपूर्ण उपल्बधी जूगु धयादिसें थुकीं नेपाःया दक्वं मां भाय्या सम्मान याइगु धयादिल । वयेकलं सपथ सम्बन्धी विद्येयकं जारी उपराष्ट्रपति झाया विवाद प्रकरण विधि सम्मत ढंगं समाधान जुइगु दाबी यानदिल ।
ज्याझ्वलय् नेपाली कांग्रेसया केन्द्रीय दुवः डा. नारायण खड्कां मां भाय् सम्बन्धी विद्येयकं लोकतन्त्रयात थप समावेशी जुइत ग्वाहालि याइगुलिं थुकी ग्वाहालि यायेत दक्वसित इनाप यानादिल ।
अथेहे नेकपा (एमाले)या पोलिटब्यूरो दुजः रामचन्द्र झां मां भाय्या नांमय् सुनां षड्यन्त्र यायेत स्वःसाः थःपिंत अमान्य जुइगु धयादिल । वयेकलं उपराष्ट्रपति झाया मां भाय् मैथिलि जूगु धयादिसें यदि संविधान संशोधन लिपाः थुकीयात गलत तरिकां व्याख्य याःसा अमान्य जुइगु धयादिल ।
ज्याझ्वलय् नेकपा (माले)या महासचिव सिपी मौनालीं सरकारं तत्काल राष्ट्रिय भाय्त पहिचान यानाः सार्वजनिक यायेमाः धयादिल । वयेकलं नेपाःया दक्वं थासय् न्ववाइगु भाय्यात सम्मान यानाःगु धयादिसें नेपाःया गुं नं समुदायया मां भाय् हिन्दी मजूगु धयादिल ।
