नेवाः-तामाङ प्रदेश अस्वीकार
येँ (सन्ध्या टाइम्स)/आन्दोलनया झ्वलय् थीथी स्वायत्त गणराज्य नापं नेवाः गणराज्य समेत घोषणा यायेधुंकूगु एनेकपा (माओवादी)या नेतातय्सं आः राज्य पुनर्संरचनाया झ्वलय् नेवाः व ताम्सालिङ स्वायत्त राज्ययात छगू हे थासय् तयाः मंकाःगु 'नेवाः-ताम्सालिङ स्वायत्त प्रदेश' दयेकेमाः धकाः हःगु प्रस्तावयात नेवाः स्वायत्त राज्य मंकाः संघर्ष समितिं अस्वीकार याःगु दु। संघर्ष समितिं धाःगु दु, 'उज्वःगु प्रस्तावयात नेवाःतय्सं स्वीकार याये फइ मखु ।'
माओवादीया पोलिटब्यूरो बैठकय् नेवाः ताम्सालिङ स्वायत्त प्रदेश दयेकेगु धकाः प्रस्ताव वःगु खँ संचार माध्यमय् पिहां वयेवं म्हिगः बहनी नेवाः स्वायत्त राज्य मंकाः संघर्ष समितिया मुँज्या च्वनाः उकियात अस्वीकार यायेगु धकाः निर्णय जूगु खँ मंकाः संघर्ष समितिया नायः नरेन्द्रभक्त हाडां 'सन्ध्या टाइम्स'यात कनादिल ।
वय्कलं नेवाःतय्गु ब्यागलं म्हसीका कायेम यायेमाःगु, नेवाःतय्त अग्राधिकार माःगु नापं नेवाःतय्सं थःगु हे कथं नेवाः स्वायत्त राज्य घोषणा यायेधुंकूगु अवस्थाय् नेवाः व तामाङयात छथासं तयाः मंकाः प्रदेश दयेकल धाःसा नेवाःतय्त स्वीकार जुइमखु धयादिल ।
माओवादी पार्टी दुने गुकथं नेवाः व तामाङयात छथासं तयेगु धकाः प्रस्ताव हःगु खः उकियात कयाः थःपिंसं याकनं हे माओवादी अध्यक्ष प्रचण्डयात हे नापलानाः ध्यानाकर्षण पौ बीगु तयारी नं नेवाः स्वायत्त राज्य मंकाः संघर्ष समितिं याःगु दु ।
