म्हमसिउपिनि गोलीं कयाः निम्ह घाःपाः

येँ (सन्ध्या टाइम्स)/म्हमसिउपिं मनूतय्सं कयेका हःगु गोलीं कयाः बाराय् निम्ह मनू घाःपाः जूगु दु। वंगु चान्हय् बाराया भगवानपुर पिपराबिर्ता गाविसया प्राविधिक सहायक महेन्द्र साह व देवपुरटेटाया वकिल यादवयात गोलीं कयेकाः घाःपाः याना बिउगु खः। घाःपाः जूम्ह यादवयात वासः याकाः छेँय् लित यंके धुंकूगु दुसा साहया अवस्था गम्भीर जूगुलिं वयात आः येँय् हयाः वासः याकूगु दु। प्रहरीं धाः कथं साहया ककुइ गोली लाःगु खः। उगु घटनाय् ल्हाः दुपिंत मालेगु शुरु याःसां आः तक सुयातं ज्वने मफुनि ।

बसया ठक्करं सित

येँ (सन्ध्या टाइम्स)/सप्तरीया कुसाहा उच्च मावि न्ह्यःने थौं सुथय् ना. ३ ख २९८४ नम्बरया बसं ठक्कर नकाः एभरेष्ट कलेजया १९ दँ दुम्ह गंगा चौधरी मंत। उगु हे घटनाय् लानाः उगु हे कलेजया १७ दँ दुम्ह नितु चौधरी घाःपाः जूगु दु।
घटनायात कयाः कलेजया विद्यार्थीतय्सं पीडितयात क्षतिपूर्ति नापं दोषीयात कारवाहीया माग यासें थौं सुथंनिसें अन चक्का जाम याना बिउगु दु ।