याकनं संविधान दयेकेत संविधानसभाय् वकिलतय् धर्ना
येँ (सन्ध्या टाइम्स)/कानून व्यवसायीतय्गु मंकाः संगठन नेपाल बार एशोसिएसनया आह्वानय् थौं वकिलत न्हू बानेश्वरया संविधानसभा भवन न्ह्यःने धर्ना च्वंगु दु। इलय् हे संविधान च्वयेत दबाव बीगु निंतिं उकथं थौं धर्ना च्वनागु खँ एशोसिएसनया महासचिव रमन श्रेष्ठं 'सन्ध्या टाइम्स'यात कनादिल ।
स्वतन्त्र, सक्षम, निश्पक्ष न्याय पालिका, कानुनी शासन व लोकतन्त्रया पक्षय् थ्व धर्ना च्वनागु खँ नं वय्कलं धयादिल ।
वइगु पुस २५ गते नेपाल बार एशोसिएसनया न्हूगु नेतृत्वया निंतिं जुइगु अधिवेशनय् देय्न्यंकंया वकिलतय्सं चुनावय् ब्वति कायेगु याइसा आः तकया एशोसिएशनया नेतृत्वया दकलय् लिपांगु ज्याझ्वः कथं थौं संविधानसभाया न्ह्यःने न्हूगु संविधान इलय् हे दयेकेत दवाव बी कथं धर्ना च्वंगु खः ।
