माओवादी विरुद्ध भण्डाफोर
येँ (सन्ध्या टाइम्स)/माओवादीं भारत विरुद्ध भण्डाफोर अभियान शुरु यायेवं एमालें माओवादी विरुद्ध भण्डाफोर अभियान शुरु याःगु दु ।
माओवादीं प्यंगूगु चरणया आन्दोलन अन्तर्गत भण्डाफोर अभियान न्ह्याकेगु घोषणा यायेधुंकाः आः एमाले व कांग्रेस नेतातय् दथुइ माओवादी विरुद्ध भण्डाफोर अभियान न्ह्याकेगु सहमति जूगु खः। थ्वकथं थौं एमालें सल्यांनं माओवादी विरुद्धया भण्डाफोर अभियान शुरु यायेत्यंगु खः। सल्यानय् वंगु मंसीर २३ गते एमालेया जिल्ला सम्मेलनय् माओवादी कार्यकर्तातय्सं आक्रमण याःगु कारणं एमालें सल्यांनंनिसें हे थ्व भण्डाफोर अभियान शुरु यायेत्यनागु खँ एमालें धाःगु दु ।
भण्डाफोर अभियान कथं याःगु थौंया सभाय् एमालेया नायः झलनाथ खनाल, वरिष्ठ नेता केपी शर्मा ओली व महासचिव इश्वर पोखरेलं न्ववानादीगु ज्याझ्वः दु। एमालें थ्व अभियान देय्न्यंकं हे न्ह्याकीगु ग्वसाः दु ।
