अमरेशकुमारपाखें कलाःयात पारया दवाब

येँ (सन्ध्या टाइम्स)/कांग्रेस 'नेता' अमरेश कुमार सिंहं मखुगु द्वपं बियाः भारतपाखें पितिंका हःम्ह कलाः नितु सिंहयात आः पार पाचुकेया भ्वँतय् सही या धकाः दवाव बियाच्वंगु खँ सीदुगु दु। थौंकन्हय् झापाया थःछेँय् च्वनाच्वंम्ह नितु मानसिक तनावं यानाः न्ववाये तकं फुगु अवस्थाय् मदुसा वया मांअबुपिंसं नितुया अवस्था सामान्य जुइवं थुकिया बारे बिचाः यायेगु खँ धाःगु दु। लिसें अमरेशकुमारं नितुयात बियातःगु येँया छेँ व इहिपाबलय् बिउगु तिसा नं लित हजि धकाः दवाव बियाच्वंगु खँ धाःगु दु। भारतीय जासुसी संस्था 'र' लिसे विशेष स्वापू दुम्ह अमरेशकुमार थौंकन्हय् न्हूदिल्लीइ हे दुसा थ्व प्रकरण सार्वजनिक जुइवं कन्हय् नेपाः वयेत्यंगु दु। वंगु संविधानसभाया चुनावया निन्हु लिपा तिनि अमरेशं नितुयात इहिपा याःगु खः ।