लुम्बिनीइ धर्मरत्न शाक्यया नामं सफूकुथि
लुम्बिनी (सन्ध्या टाइम्स)/अन्तर्राष्ट्रिय बौद्ध समाज (आईबीएस) या झिंन्हय्क्वःगु दँमुँज्या नापं नकतिनि चायेकूगु धर्म-पुष्प पुस्तकालयया उलेज्या छगू ज्याझ्वःया दथुइ राष्ट्रिय योजना आयोगया दुजः कमलेश्वरपुरी गोश्वामीं यानादिल। ज्याझ्वः आईबीएसया संस्थापक अध्यक्ष भिक्षु मैत्री महास्थविरया सभापतित्वय् जूगु खः ।
आईबीएसपाखें लुम्बिनी जःखः स्थानीय जनताया लागिं स्वास्थ्यया नापं पम्पसेट, ट्युबवेल इनेगु, पौष्टिक नसा ज्वलं उपलब्ध यायेगु, इलय् ब्यलय् स्वास्थ्य शिविर न्ह्याकेगु ज्या याना वयाच्वंगु दु ।
उगु हे ज्याझ्वलय् नांजाःम्ह बौद्ध विद्वान मदुम्ह धर्मरत्न शाक्यया नामं नीस्वंगु 'धर्म-पुष्प पुस्तकालय'या उलेज्या नं जूगु खःसा उगु पुस्तरण् कालयया महत्व बारे उकिया संयोजक सुशीला शाक्यं कनादीगु खः। वय्कलं कनादी कथं मदुम्ह धर्मरत्न शाक्यं नेपालभाषां ४६, खँय् भाषां ४२ गू सफू पिकयादीधुंकूगु दुसा मेगु ७१ गू सफू तयार जुयाच्वंगु दु।
ज्याझ्वलय् न्ववासें लुम्बिनी विकास कोषया कोषाध्यक्ष कर्मसाम्चो शेर्पां आईबीएसलिसे सहकार्य याये दयाः थःपिं लय्तायागु खँ कनादिल ।
उगु ज्याझ्वलय् सीएलसीया अध्यक्ष सजरुद्दिन खां, लुम्बिनी सीएमसीया अध्यक्ष अब्दुल मोबिन खां, मधुवनी गाविस अध्यक्ष रामसमुझ गुप्ता, लुम्बिनी उमाविया प्रिन्सिपल ध्रुवचन्द्र त्रिपाठी नापं स्थानीय थीथी निकायया पदाधिकारी व समाजसेवीतय्सं पुस्तकालय व आईबीएसयात भिंतुना बियादीगु खः ।
