बौद्ध सम्पदा संघया चारधाम यात्रा

ख्वप (सन्ध्या टाइम्स)/भक्तपुर बौद्ध सम्पदा संघं थःपिनि थीथी ज्याझ्वः यायेगु झ्वलय् वंगु वालय् बौद्ध धर्मया चारधाम भ्रमण यात। उगु पुचलं लुम्बिनी, बोधिगया, सारनाथ, कुसीनगर नापं संकाइय, श्रावस्ती, आगरा लगायत थीथी बौद्ध तीर्थस्थल चाःहिलीगु ज्याझ्वः दु। नेपाल परम्परागत बौद्ध धर्म संघ ख्वप शाखा नापं जानाः छवाःया थुगु भ्रमण याःगु खः। ४६ म्ह दुजः दुगु उगु भ्रमण पुचः वइगु पुस २६ गते देशय् लिहां वइगु ज्याझ्वः दु।
थ्वहे झ्वलय् वइगु माघ २ गते झोरबहिली भक्तपुर बौद्ध सम्पदा संघया झिंप्यक्वःगु तःमुँज्या व अधिवेशन जुइगु जूगु दु ।

थ्वयां न्ह्यः युवा बौद्ध पुचःया सक्रियताय् वइगु पुस २१ गते मंगलवाः कुन्हु मुनि विहारय् थुगुसीया स्वक्वःगु श्रामणेर प्रवज्या याइगु ज्याझ्वः दु। मुनि विहारया प्रमुख भिक्षु विपश्वीया संयोजनय् उपसंघनायक भिक्षु अश्वघोष महास्थविरया उपाध्यायकत्वय् उगु ज्याझ्वः जुइत्यंगु खः। थ्वयां न्ह्यः कार्तिक व मंसीरं नं मुनि विहारय् श्रावणेर प्रवज्या यायेधुंकूगु दु ।