नेप्से सामान्य अंकं क्वय्
येँ (सन्ध्या टाइम्स)/नेपाल स्टक एक्सचेन्जय् थ्व वाःया न्हापांगु न्हिया शेयर कारोबारं बजार परिसुचक नेप्से सामान्य अंकं कुहां वंगु दु। स्टक एक्सचेन्जया बजाः चालेवं नेप्से कारोबार कुहां वनेगु शुरु जूगु खःसा दथुइ छझाः सामान्य थहां कुहां जूसां कारोबारया अन्तय् छुं भतिचा नेप्से थहां वंगु खः। तर नं लिपांगु वाःया नेप्सेया अंक धाःसा पुलेमफुत ।
थ्व वाःया न्हापांगु न्हिया शेयर कारोबारं बजार परिसुचक कुहां वनेगु झ्वलय् नेप्से परिसुचक १ दशमलव १५ अंक कुहां वनाः ५४६ दशमलव ९६ अंकय् थ्यंगु दु। अथे हे सेन्सेटिभ शुन्य दशमलव ३६ अंकं कुहां वंगु दुसा फ्लोट नं शुन्य दशालम २ अंकं कुहां वंगु दु ।
थ्व वाःया न्हापांगु न्हिया कारोबारय् बजार परिसुचक नापं वीमा समुहया उपसुचक छगू त्वःताः कारोबार जूगु दक्वं समुहया उपसुचक कुहां वंगु दु। नेप्सेय् दकलय् अप्वः प्रभाव लाकीगु वाणिज्य समुहया सुचक १ दशमलव ५ अंकं कुहां वनाः ५२८ दशमलव ५९ अंकय् थ्यन। विकास बैंक समहुया सुचक नं १ दशमलव ५८ अंकं कुहां वनाः ५९५ दशमलव ९५ अंकय् थ्यन। कुहां वःगु उपसुचकय् दकलय् अप्वः जलविद्युत समुहया उपसुचक ४ दशमलव ११ अंकं कुहां वयेवं ८०८ दशमलव ५३ अंकय् थ्यन। नापं फाइनान्स समुहया सुचक नं १ दशमलव ८ अंकं कुहां वनाः ५४४ दशमलव ७६ अंकय् थ्यंगु दु ।
उखे थहां वंगु छगू जक उपसुचक मध्ये वीमा समुह २ दशमलव १६ अंकं थहां वनाः ५७७ दशमलव ५ अंकय् थ्यंगु दुसा दलकय् मध्ये अप्वः उतारचढाव जुयाच्वनीगु अन्य समुहया सुचकय् छुं हिउपाः वःगु मदु ।
स्टक एक्सचेन्जय् न्हापांगु न्हिया शेयर कारोबारय् ख्वीगू कम्पनीया न्हय्निद्वः स्वसः व चय्प्यंगु कित्ता शेयर न्याये�मी जुयाः स्वंगू करोड न्हय्न्यागू लाख चय्द्वः तका दांया कारोबार जुल । वंगु छुं दिं न्ह्यःनिसे नेप्से सामान्य अंकं थहां कुहां जुयाच्वंगु दुसा दांया कारोबार धाःसा लगभग यथावत हे जुयाच्वंगु दु ।
शेयर कारोबार जूगु कम्पनी मध्ये नीगू कम्पनीया शेयर भाः थहां वंगु दुसा स्वीछगू कम्पनीया शेयर भाः कुहां वंगु दु मेगु झिगू कम्पनीया शेयर भाः धाःसा यथावत हे कायम जुल । म्हिगःया कारोबारय् स्टायण्डर्ड चार्टर्ड बैंकं दां ल्याखं दकलय् अप्वः पीच्यागू लाख ख्वीप्यद्वः तका दांया कारोबार याःगु दु। सम्झना फाइनान्स कम्पनीं दकलय् अप्वः लबः कायेत ताःलाःगु दुसा सेन्ट्रल फाइनान्स लिमिटेडं दकय् अप्वः द्यापं फयेमाःगु दु ।
