अख्तियार आयुक्तय् केशव बराल
संवैधानिक परिषदया सोमवाः च्वंगु बैठकं अख्तियार दुरुपयोग अनुसन्धान आयोगया आयुक्तय् पुलाम्ह प्रहरी अतिरिक्त महानिरीक्षक केशव बरालयात सिफारिस याःगु दु ।
प्रधानमन्त्रीया ज्याकू सिंहदरवालय् च्वंगु संवैधानिक परिषदया बैठकं सोमवाः निसें पदाधिकारी विहीन जूगु आयोगय् बरालया नां सिफारिस याःगु खः । प्रहरीलय् स्वीदँ सेवा यानाः दछि न्ह्यः अवकाश जुयादीम्ह बरालयात परिषदं सिफारिस याःगु खः ।
२०३५सालं निसें प्रहरी सेवा शुरु यानादीम्ह बारल व्यवस्थापिका संसदया संसदीय सुनुवाई लिपा जक अख्तियारय् नियुक्त जुयादी ।
ताः ई न्ह्यः निसें संवैधानिक निकायया पदाधिकारी नियुक्तिया निंतिं सहलह यायेत सोमवाः च्वंगु परिषदया बैठकं अख्तियार आयुक्तया नां सिफरिस याःसां लोकसेवा आयोग, निर्वाचन आयोग, महालेखा परीक्षकया प्रमुख धाःसा नियुक्त यायेमफुत ।
थौंया बैठकय् नं प्रमुख विपक्षी दल एनेकपा (माओवादी)या अध्यक्ष पुष्पकमल दाहाल 'प्रचण्ड' उपस्थित जुयामदी ।
