भारतं सीमा अतिक्रमण याःगु संसदीय पुचःया ठहर
भारतं सुस्ता निसें टनकपुर तकया थीथी थासय् सीमा अतिक्रमण याःगु ठहर संसदीय पुचलं याःगु दु । संसदीय पुचलं सीमाय् च्वनाच्वंपिं भारतीय पक्षया ज्यादति नेपाःमितय्सं भोगे याये मालाच्वंगु नं निष्कर्ष पिकाःगु दु ।
पुचलं सरकारं प्राविधि पुच पाखें पूवंक सिमानाया अनुगमन यानाः पूलांगु वास्तविक नक्शाया आधारय् नक्शांकन यानाः जक नेपाःया पाखें हस्ताक्षर यायेमाःगु सुझाव ब्यूगु दु । नेपाल सरकारं सन् २००७ सेप्टेक्बरय् हस्ताक्षरया निंतिं तयार याःगु नक्शा त्रुटिपूर्ण जूगु ठहरं नं उगु पुचलं याःगु दु ।
सुस्ता निसें टनकपुर तकया सिमाना अनुगमन याःगु पुचलं आइतवाः धनगढीलय् याःगु पत्रकार सम्मेलनय् न्ववानादिसें परराष्ट्र व मानव अधिकार समितिया सभापति पदमलाल विश्वकर्मां द्वलंद्व बिगाह नेपाःया भूभाग अतिक्रमण जूगु खँ अध्यनं क्यंगु कनादिल । वयेकलं सिमानाय् नेपाःमितय्सं एसएसबीया ज्यादति सह यायेमाःगु व अन राज्यया उपस्थिति मदुगु खँ धयादिल ।
भारतं छगू किलोमिटरया बिस्कं सिमाना सुरक्षा पोष्ट तःगुलि नेपाःया पाखें उपस्थिति फाटफुट बाहेक मदु । नेपालं नं भारतया हे अनुपाय् सुरक्षा पोष्ट तःसाः सीमा अतिक्रमण व नेपाःमितय्त जुयाच्वंगु ज्यादतिलय् म्हो वइगु राय संसदीय पुचलं ब्यूगु दु ।
नेपाः व भारतया सीमाय् मूल खम्बा मदुगु, मूल खाम्बा मेथाय् हे तयातःगु, खुसीया घार परिवर्तन याःगु लगायतया कारणं सीमा अतिक्रमण यायेत भारतयात अःपूगु निष्कर्ष पुचलं पिकाःगु दु । उगु पुचलं १८६० सालया नक्शाया आधारय् सीमांकन यानाः न्हूगु नक्शा देयेकाः हस्ताक्षर यायेमाःगु राय नं ब्यूगु दु ।
