उपरथी सिंहया बढुवा दिकेत सर्वोच्चया आदेश
सर्वोच्च अदालतं उपरथी तोरण जंगबहादुर सिंहया बढुवा दिकेत अन्तरिम आदेश जारी याःगु दु ।
प्रधानन्यायाधीश अनुपराज शर्माया एकल इजलाशं आइतवाः उगु आदेश जारी याःगु दु । मानव अधिकार उल्लंघन प्रकरणय् फसेजुयाच्वंम्ह सिंहयात रथीलय् बढुवा यायेगु मन्त्रिपरिषदया निर्णय बदर यायेमाःगु माग यासें माओवादी केन्द्रीय दुजः कृष्ण केसी, अखिल क्रान्तिकारीया महासचिव हिमाल शर्मा व विना मगरं मंकाः रिट दायर याःगु खः ।
उमिसं सिंहयात नागरिक बेपत्ता यायेगु ज्याय् संलग्न जूगुलिं कारवाहीया माग नं याःगु खः । रिटय् प्रधानमन्त्री व मन्त्रिपरिषदया ज्याकू, रक्षामन्त्रालय व सैनिक मुख्यालययात विपक्षी देयेकातःगु खः ।
द्वन्द्वकालय् भैरवनाथ गणपाखें पीगुम्ह बन्दीतय्त बेपत्ता याःगु द्वपं लानाच्वंम्ह सिंहयात पुस ९ गते च्वंगु मन्त्रिपरिषदया बैठकं बलाधिकृत रथीलय् बढुवा यायेगु निर्णय याःगु खः । सिंहयात मानव अधिकार उल्लंघन याःगु प्रकरणय् फसेजुयाच्वंगुलिं राष्ट्रिय व अन्तर्राष्ट्रिय मानवअधिकार संघ संस्था व कुटनीतिक नियोगं बढुवा मयायेत सरकारयात दबाव बियावाच्वंगु खः ।
