संवैधानिक समितिया बैठक स्थगित
न्हूगु संविधानया न्हापांगु मस्यौदाय् हस्ताक्षर यानाः आइतवाः अन्तिम रुप बीत सःतुगु संवैधानिक समितिया बैठकय् दलतय्सं अध्ययनया निंतिं ई फ्वनेवं बैठक अनिश्चितकालया निंतिं स्थगित जूगु दु ।
आइतवाः च्वंगु बैठकय् माओवादी सहितया अधिकांस दलतय्सं मस्यौदाय् न्ह्यथंनातःगु गुलिखें विषयत न्हापाया सहमति विपरित वःगु व बिस्कं मतयात समेत मस्यौदाय् समावेश यायेमाःगु माग यायेवं बैठक स्थगित जूगु खः । बैठकं मस्यौदायात अध्ययन यायेत थप ई ब्यूसां आः बिस्कं मत व संशोधन यायेमदइगु खँ समितिया सभापति निलाम्बर आचार्यं धयादीगु दु ।
मस्यौदा व अवधारणाय् बिस्कं मत तयेगु ई थ्वस्वयां न्हापा हे फुइधुंकूगुलिं आइतवाःया बैठकय् बिस्कं मत तये दइगु की मदइगु बारे सभासद्त दथुइ विवाद जूगु खः । बैठकय् छुं सभासद्तय्सं थःपिनिगु बिस्कं मत दुमथ्याकूसाः देय्न्यकं आन्दोलन यायेगु ख्याच्वः नं ब्यूगु खः ।
समितिया बैठकय् न्यय्खुम्ह सभासद्तय् उपस्थिति दुगु खःसा उकी पीगुम्ह सभासद्तय्सं मस्यौदाय् बिस्कं मत तयेगु खँ धाःगु खः ।
