घोषणाया लसताय् जागरण मंचया कौला
येँ (सन्ध्या टाइम्स)/नेवाः स्वायत्त राज्य घोषणा जूगु लसताय् नेवाः स्वायत्त राज्य मंकाः संघर्ष समितिया छगू घटक नेवाः जागरण मंचया ग्वसालय् म्हिगः थनया क्षेत्रपाटी पार्टी पालेसय् कौला ज्याझ्वः जुल ।
मंचया संयोजक सुजीव वज्राचार्यया सभापतित्वय् जूगु ज्याझ्वलय् मूपाहां संस्कृतिविद् सत्यमोहन जोशीं नेवाः स्वायत्त राज्य घोषणा जुइधुंकूगु अवस्थाय् आः थुकियात संस्थागत याना यंकेगुपाखे झी सकलें लगे जुइमाःगु खँ कनादिल ।
यदि आः नं झी सुम्क च्वनाच्वन धाःसा लिपाया झी पुस्तां झीसं छुं हे याना मथकू धकाः धिक्कारे याये फइगु अवस्था वइगु खँय् सचेत यानादिसें मूपाहां जोशीं झी नये खनीगु, च्वने खनीगु जक दयां मगाः झीसं ल्हायेगु भाय् मंत धाःसा व तसकं दुर्भाग्य जुइगुलिं आवंनिसें हे झी लगे जुइमाःगु दु धयादिल ।
ज्याझ्वलय् नेवाः स्वायत्त राज्य मंकाः संघर्ष समितिं यायेमाःगु ज्या अझं दनिसा नेवाः स्वायत्त राज्यया मित्र शक्ति व शत्रु शक्ति म्हसीकेगु खःसा सुनां नेवाः राज्ययात समर्थन व तिबः बी व झीगु मित्र शक्ति जुइगु व नेवाः राज्यया विरोधय् वनीपिं सकलें शत्रु शक्तिया रुपय् कायेमाःगु खँ कनादिल।
मंचया सचिव विजयकृष्ण श्रेष्ठं लसकुस यानादीगु ज्याझ्वलय् मंचया सल्लाहकार डा. महेशमान श्रेष्ठ, संघर्ष समितिया सल्लाहकार नापं नेपाली कांग्रेसया नेता प्रा. भिमसेनदास प्रधान, नेपाः राष्ट्रिय पार्टीया नायः डा.केशवमान शाक्य व नेवाः देय् दबूया नायः नापं संघर्ष समितिया छ्याञ्जे नरेश ताम्राकारपिंसं नं न्ववानादीगु खः ।
