नेवाः राज्य विरुद्ध स्वनिगः बन्द घोषणा
येँ (सन्ध्या टाइम्स)/एनेकपा (माओवादीं) जक मखु जनस्तरं नेवाःतय्सं मंकाः कथं नेवाः स्वायत्त राज्य दयेमाः धकाः नेवाः स्वायत्त राज्य घोषणा याये धुंकूगु अवस्थाय् नेवाः स्वायत्त राज्ययात हाथ्या बियाः संविधानसभाय् दुथ्याःगु राष्ट्रिय जनमोर्चा नेपालं संघीयताया विरोधय् स्वनिगः बन्द घोषणा याःगु दु ।
संविधानसभाय् दुथ्याःगु दलत मध्ये संघीयतायात तप्यंक हे विरोध याना वयाच्वंगु छगू जक पार्टी राष्ट्रिय जनमोर्चा नेपालं थ्व हे वइगु पुस २६ गते यातायात, कल कारखाना, शिक्षण संस्था, बजाः फुक्कं बन्द यायेगु कथंया स्वनिगः बन्द यायेगु घोषणा याःगु खः। नेकपा (मसाल)या चुनावी मोर्चा कथं न्ह्यःने वयाच्वंगु राष्ट्रिय जनमोर्चाया नायः नापं सभासद् चित्र बहादुर केसीं 'सन्ध्या टाइम्स'लिसे खँ ल्हासें गणतन्त्र संस्थागत यायेत, राष्ट्रियताया संरक्षण व सम्वर्द्धनया निंतिं थःपिंसं संघीयता विरुद्ध आन्दोलन यायेगु झ्वलय् स्वनिगः बन्द वइगु २६ गते आइतवाः यायेत्यनागु खः धकाः धयादीगु दु। वय्कलं संघीयता विरुद्ध आन्दोलनया हे झ्वलय् वइगु २१ गते सेती महाकाली, २२ गते नारायणी, २९ गते पूर्वाञ्चल व माघ ६ गते राप्ती लुम्बिनी बन्द यायेगु जुइ धयादीगु दु ।
आन्दोलनया हे झ्वलय् वइगु फागुन ५ गतेनिसें २० गते तक देय्न्यंकं गाविस, नगर व जिल्ला जिल्लाय् संघीयता विरुद्ध जन परिचालन कथं अभियान न्ह्याकेगु जुइ धकाः नं राष्ट्रिय जनमोर्चा नेपालं धाःगु दु ।
