प्रचण्डया चश्मा काये ल्वःमंबलय्......
येँ (सन्ध्या टाइम्स)/खँ उकुन्हु माओवादीं संसद चले याके बिउगु न्हापांगु न्हिया खः। वकुन्हु प्रधानमन्त्री माधव नेपालं नं संवोधन यायेगु ज्याझ्वः दुगु खः। तर प्रम नेपाल संवोधन याये धकाः वःबलय् अन मेपिं सभासद्तय् ताताःहाकःगु भाषण जुयाच्वन। उकिं प्रम छझाः पिहां झायादिल। लिहां झाःबलय् विपक्षी बेञ्चय् माओवादी अध्यक्ष प्रचण्ड नं दी ।
प्रम नेपाल तप्यंक प्रचण्ड च्वनाच्वंगु सिटपाखे वनाः वय्कःयात छगू प्याकेट भ्वं खुसुक्क बियादिल। प्रचण्डं नं व प्याकेट कया खतं खल्तीइ ख्वाराक्क तया हे छ्वत। प्याकेट छु खः धकाः सुनां नं मसिउ। लिपा सभासद् सुभाष नेम्बाङं प्रम नेपालयात न्हाचः छु प्याकेट बियादियागु धकाः न्यंबलय् तिनि प्रमं खुसुक्क धयादिल, 'प्रचण्डजुया चश्मा। म्हिगः जिथाय् त्वःफिउगु ।'
वयां छन्हु न्ह्यः अर्थात न्हूगु वानेश्वरय् प्रचण्डया विवादास्पद भाषणया कन्हय् कुन्हु सनिलय् प्रचण्ड व मोहन वैद्य माधव नेपालया छेँय् खँ ल्हाः वंगु खः। अन भचा भचा त्वनेगु नं ज्या जूगु जुयाच्वन। सूत्रं बिउगु जानकारी कथं अन प्रचण्डं न्यागू पेग कयादीगु खः। थुकिं यानाः वय्कयाः खँ लरबर जूगु व लिपा मोहन वैद्यं 'थौं वना छ्वये, लिपा छक्वः हानं खानपिन मयासे बैठक च्वने' हथासं पित हःगु खः। हथासं पिहां वःबलय् प्रचण्डया चश्मा हे काये ल्वःमंगु जुयाच्वन। वहे काये ल्वःमंगु चश्मा प्रम नेपालं कन्हय् कुन्हु भ्वँतय् प्याक यानाः खुसुक्क बियादीगु खः। वकुन्हु प्रचण्डं सुरय् वयाः भारत विरुद्ध मेगु नं आपालं खँ न्ववानादीगु जानकारी नं सूत्रं बिउगु दु ।
