छवाःया कारोबार कुहां वन
येँ (सन्ध्या टाइम्स)/नेपाल स्टक एक्सचेन्जय् जूगु शेयर कारोबारं थ्व वालय् नेप्से परिसुचक थहां वंगु दु। थ्व वाःया न्हापांगु न्हि ५४५ दशमलव २७ अंकं शुरु जूगु कारोबारं छवाःया दुने २ दशमलव ८४ अंकं थहां वनाः ५४८ दशमलव ११ अंकय् थ्यंकाः बजाः बन्द जूगु खः ।
स्टक एक्सचेन्जया कथं थ्व वाःया दुने ग्वीनिगू कम्पनीया ४६४३ गू कारोबारं झिंन्हय्गू करोड नीन्हय्गू लाख ख्वीन्हय्द्वः तका दां बराबरया स्वंगू लाख स्वीन्हय्द्वः व न्हय्सःगू कित्ता शेयर न्याये-मी जुल। थ्वयां न्ह्यःया वालय् ६२६४ गू कारोबारं नीखुगू करोड न्यय्गुंगू लाख स्वीन्हय्द्वः तका दां बराबरया प्यंगू लाख चय्प्यद्वः व निसः गू कित्ता शेयर न्याये-मी जूगु खः। थ्व ल्याखं वंगु वालय् स्वयां थ्व वालय् जूगु दांया कारोबार ३५ दशमलव शुन्य ३ प्रतिशतं कुहां वःगु दु।
थ्व वालय् जूगु कूल कारोबारय् 'क' वर्गय् लाःगु कम्पनीया जक च्यागू करोड नीनिगू लाख तका दांया कारोबार जुल। थ्व नेप्सेय् जूगु कूल कारोबारया ४७ दशमलव ६२ प्रतिशत खः।
थुगु वालय् 'क' वर्गया कारोबार मापन याइगु सेन्सेटिभ शुन्य दशमलव ५८ अंकं थहां वनाः १३५ दशमलव ६० अंकय् थ्यंगु दु। सेन्सेटिभया थ्व वालय् १३५ दशमलव शुन्य २ अंकं कारोबार शुरु जूगु खः ।
थ्व वाःया कारोबारय् निगू करोड प्यंगू लाख तका दांया कारोबार याःगु लिधंसाय् स्टायण्डर्ड चार्टर्ड बैंक, स्वीन्याद्वः कित्ता शेयर न्याये-मी जूगु व दकलय् अप्वः खुसः व नीगुंगू कारोबार याःगु लिधंसाय् भिवोर विकास बैंक कारोबार याःगु कम्पनीया धलखय् दकलय् न्ह्यःने लाःगु दु ।
नेपाल धितोपत्र बेर्डय् थ्व वालय् नविल बैंक बोनस शेयर सुचिकृत जूगु दु ।
