एमालेया जबजय् सुधारया खँ
नेकपा एमालें आः जुइगु थःपिनि च्याक्वःगु पार्टी महाधिवेशनय् पार्टीया निर्देशक सिद्धान्त जुयाच्वंगु जनताको बहुदलीय जनवादयात सुधार यायेगु धकाः हःगु विषययात कयाः विवाद जूगु दु । पार्टीया संस्थापन पक्षं उकी सुधारया खँ हःगु खःसा मेगु पक्षं थुकिया विपक्षय् बिचाः तयाच्वंगु खः ।
एमालेया तत्कालिन महासचिव मदन भण्डारीं हःगु जनताया बहुदलीय जनवाद छगू आधुनिक युगय् नं
माक्स्रवादयात जीवित रुपं न्ह्याका तयेगु छगू सशक्त बिचाः खः । थुकी विवाद मदु कि थौंया युगय् परम्परागत ढंगं एकदलीय तानाशाह लादे यानाः माक्स्रवादन्ह्याके फइ मखु । उकिं विश्वन्यंकं वयाच्वंगु बहुदलीय व्यवस्थाया लहरयात आत्मसात यानाः मदन भण्डारीं थ्व बिचाः पित बिउगु खः । यद्यपि बहुदली जनवादी बिचाः २०१६ सालपाखे कम्युनिष्ट पार्टीया संस्थापक महासचिव पुष्पलाल श्रेष्ठं नं थःगु दस्तावेजय् उल्लेख यायेधुंकूगु खः । मदन भण्डारीं उकियात सैद्धान्तिक ख्वाःपाः बियाः पित हःगु खः । तर उगु सिद्धान्तयात पित हःम्ह मदन भण्डारी उकियात लागू याये न्ह्यः हे मंत । वयां लिपा जनयुद्ध मार्फत सत्ताय् वःम्ह नेकपा माओवादीं नं बहुदलीय प्रतिस्पर्धायात स्वीकार यायेगु धाःगुलिं माओवादीया बिचाः नं जबजलिसे यक्व सतिक लाः वंगु दु । उकिं यदि माओवादीलिसे तालमेल यानाः वनेगु व छगू हे तःधंगु कम्युनिष्ट पार्टी दयेकाः न्ह्याः वनेगु खःसा जनताया एमालें नं थःगु सिद्धान्तय् सुधार यानां छुं स्यनी मखु । युग मदन
भण्डारीं बिचाः याःगु स्वयां नं हिलेधुंकल । उकिं न्हूगु युगलिसे न्ह्याः वनेगु खःसा थःगु बिचाःयात सकारात्मक सुधार यायेत लिचिले मजिउ ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
