संवैधानिक समितिलय् सुजाताया अभिव्यत्तिया विरोध
उपप्रधानमन्त्री सुजाता कोइरालां संघीयताया विषयलय् प्वंकूगु अभिव्यक्ति प्रति संविधानसभाया संवैधानिक समितिलय् सभासदतय्सं आपत्ति प्वंकूगु दु । समिमितया आइतवाः च्वंगु बैठकय् सभासदतय्सं जिम्मेवार मन्त्री पाखें अन्तरिम संविधान विपरित बिचाः प्वंकूगु धासें उगु धापू प्रति आपत्ति प्वंकूगु खः ।
बैठकय् माओवादी उपाध्यक्ष डा. बाबुराम भट्टराईं अन्तरिम संविधानया मर्म विपरित मन्त्री कोइरालां बिचाः प्वंकूगु धायादिसें उकी आपत्ति प्वंकादीगु खः । अथेहे मेपिं सभासद्तय्सं नं उपप्रधानमन्त्री कोइरालाया धापू प्रति प्रधानमन्त्रीया ध्यानाकर्षण याकूगु खः ।
उगु बैठकय् प्रधानमन्त्री माधवकुमार नेपालं उपप्रधानमन्त्री कोइरालाया धापू व्यत्तिगत जूगु धयादिसें सरकार अन्तरिम संविधानया भावना अनुकुल न्ह्याः वनीगु प्रतिबद्धता प्वंकादिल । नापं वयेकलं बैठकय् उपस्थित उपप्रधानमन्त्री कोइरालायात संघीयता विरुद्ध अभिव्यक्ति मबीत व जिम्मेवार जुया प्रस्तुत जुइत निर्देशन बियादिल ।
