'माओवादीया कारणं संयन्त्र गठन मजूगु'
नेपाली कांग्रेसया उपसभापति रामचन्द्र पौडेलं स्वलाःया दुने शान्ति प्रकृयायात क्वचायेकाः हे त्वःतेगु निर्णय पार्टीं याःगु खँ धयादीगु दु । वयेकलं उकीया निंतिं कांग्रेसं गृहकार्य शुरु याःगु खँ नं धयादिल ।
नेपाल प्रेस युनियन झापां आइतवाः विर्तामोडय् ग्वसाःग्वःगु पत्रकार सम्मेलनय् न्ववानादिसें वयेकलं कांग्रेसं शान्ति प्रकृयायात तार्किक निष्कर्षय् थ्यंकेत स्वलाःया ई क्वःछिनाः ज्या न्ह्याकाच्वंगु धयादिल ।
वयेकलं जनपरिचालन व वार्ताया माध्यमं माओवादीया समस्या समाधान याना: संविधान निर्माण यायेगु ज्याय् ह्येत नं कांग्रेस ज्या यानाच्वंगु धयादिल । वयेकलं वार्ता व जनमत निर्माणं सहमतिया निंतिं माओवादी बाध्य जुइगु नं दाबी यनादिल ।
शासन संचालनय् वइगु समस्या व व्यवधानयात चीकेत उच्चस्तरीय राजनीतिक संयन्त्र गठन यायेत थीथी राजनीतिक दलनाप तःक्वः हे सहलह जुइधुंकूसां माओवादीया अडानया कारणं संयन्त्र गठन जुइमफुगु द्वपं नेतां पौडेलं बियादिल ।
वयेकलं थःपिं समस्या समाधानया निंतिं संयन्त्र गठनय् लगेजुयाच्वंगु तर माओवादी अध्यक्ष पुष्पकमल दाहाल 'प्रचण्ड' धा:सा प्रधानमन्त्री जुइगु पाखे लगेजुयाच्वंगुलिं सहमति जुइमफुगु धयादिल ।
