एमाले अध्यक्षया धापू प्रति कांग्रेसया आपत्ति
नेकपा (एमाले)या अध्यक्ष झलनाथ खनालं सहमतीय संस्कृति विपरीत अभिव्यक्ति ब्यूगु धासें नेपाली कांग्रेस संसदीय दलं अपात्ति प्वंकूगु दु । एमाले अध्यक्ष खनालं राजनीतिक सहमतिया निंतिं कांग्रेस बाधक जूगु अभिव्यक्ति प्रति कांग्रेसं अपत्ति प्वंकूगु खः ।
कांग्रेस संसदीय दलया शनिवाः सिंहदरवारय् च्वंगु बैठकं दलत दथुइया सहमतिं शान्ति प्रकृयायात निष्कर्षय् थ्यंकेमाःगु व निर्धारित इलय् हे संविधान च्वयेमाःगु इलय् छगू दलं मेगू दलयात द्वपं मबीत इनाप याःगु दु ।
अथेहे बैठकं माओवादीं कब्जा याःगु निजी व सरकारी सम्पत्ति लितकायेगु ज्याय् पहल यायेत गृह प्रशासनया ध्यानाकर्षण नं याकूगु दु । नापं बैठकं पार्टी केन्द्रीय समितिं प्रस्ताव याःगु राष्ट्रिय मेलमिलापया अधियानयात संविधान निर्माणया विषय नापं स्वनाः न्ह्याः वनेमाःगु खँय् बः ब्यूगु दु । बैठकं कांग्रेस सभापति गिरिजाप्रसाद कोइरालायात नोबल शान्ति पुरस्कारया निंतिं सिफारिस यायेगु ज्याया लसकुस नं याःगु दु ।
बैठकय् सभासद्तय्सं पार्टीं पाखें सरकारय् वंपिं मन्त्रीतय् कार्य्रशैली प्रति असन्तुष्टि प्वंकूगु दु । मन्त्रीत जनता व पार्टी प्रति उत्तरदायी दयेकेगु ज्याय् पार्टी नेतृत्वं पहल यायेमाःगु खँय् सभासद्तय्सं बः ब्यूगु खः ।
