संघीयता जनमत संग्रह पाखें जक वनेमाःगु : उपप्रम
उपप्रधानमन्त्री सुजाता कोइरालां संघीयताय् वने न्ह्यः जनमत संग्रह यायेमाःगु खँ धयादीगु दु । वयेकलं जनमत संग्रह मयासें संघीयताय् वनाः दलतय्सं तःधंगु गल्ती याःगु खँ धयादीगु दु ।
शनिवाः येँ जूगु छगू अर्न्तक्रिया ज्याझ्वलय् न्ववानादिसें वयेकलं दलतय्सं संघीयताय् वनेगु की मवनेगु धकाः जनताया चाहना मन्यंगु व जनताया इच्छा थुइकेगु ज्या मया:गु टिप्पणी यानादिल । वयेकलं संघीयतालय् वनेगु निर्णय हे गल्ती जूसां संघीय राज्यया खाकाया बारे थःगु बिचाः धाःसा न्ह्यब्वयादिल ।
वयेकलं नेपाःलय् स्वंगू निसें न्यागू जक प्रान्त जुइमाःगु धयादिसें थुकीयात दक्षिण व उत्तरया मिले यानाः दयेकेमाः धयादिल । वयेकलं थीथी दलतय्सं न्ह्यब्वःगु संघीयताया खाकाया नं विरोध यानादिल । वयेकलं मेगू दलतय्सं धाः काथं नेपालय् यक्व प्रान्त आवश्यक मजूगु धयादिल ।
अथेहे उपप्रधानमन्त्री कोइरालां माओवादीयात संविधान निर्माण ज्याय् गम्भीर जुइत इनाप यानादिसें उच्चस्तरीय राजनीतिक संयन्त्रय् च्वनेत इनाप यानादिल । वयेकलं माओवादीया विरोध, बन्द आदि ज्याझ्वलं माओवादींयात हे हानी जुइगु नं धयादिल ।
