स्थानीय जनतापाखें ग्वल देय् बन्द
पशुपतिइ पुजारी नियुक्तिया खँय् पिहां वयाच्वंगु विवादयात कयाः थौं स्थानीय जनतां ग्वल देय् बन्द याःगु दु । बन्दया झ्वलय् स्थानीय जनतां थौं पशुपति लागाय् गाडी छगः हे दुमकाःसा अन च्वंगु सम्पूर्ण पसः नं बन्द याना बिउगु दु । थौं उगु लागाय् पशुपति महाद्यःयात छायेगु स्वां सिन्हः मीपिनिगु पसः तकं मचाः । स्थानीय भण्डारीतय्त ल्हाः वाःगु विरोधय् थौं अनया मेपिं स्थानीय मनूत नं सतकय् कुहां वयाः विरोध प्रकट यानाच्वंगु दु । पशुपति लागाय् गाडी दुमकाःगुलिं अनया ट्राफिक नं अवरोध जुयाच्वंगु दु ।
पशुपतिया भण्डारीतय्सं ज्या बहिष्कार याःगुलिं पशुपतिया नित्यपुजा व स्नान तकं जुइ फयाच्वंगु मदुनि । सरकारं नियुक्त याःपिं निम्ह पुजारीतय्सं सामान्य स्वां सिन्हः जक तिकाः पशुपतिया पुजा यानाच्वंगु दु । थ्वहे झ्वलय् सरकारं सर्वोच्च अदालतं बिउगु आदेश पालना यायेगु बचं बिउगु दु ।
