प्रधानमन्त्री व अनमिन प्रमुख दथुइ खँल्हाबंला
प्रधानमन्त्री माधवकुमार नेपालं राष्ट्रसंघीय अनमिनया प्रमुख करिन ल्यानग्रेनयात एनेकपा (माओवादीं) बृहत शान्ति सम्झोताया उल्लंघन यानाच्वंगु बारे ध्यानाकर्षण याकादीगु दु ।
शुक्रवाः सुथय् प्रधानमन्त्री निवास बालुवाटार थ्यंकादीम्ह ल्यानग्रेनयात प्रधानमन्त्री नेपालं माओवादीं बारम्बार मेमेगू दलया कार्यकर्तातय्त आक्रमण याइगु, शिविरं ल्वाभः सहित पिहांवइगु व सरकारी नापं निजी छेँबुँत कब्जा याःगु लगायतया विषयलय् ध्यानाकर्षण याकादीगु खः ।
वयेकलं सरकार शान्ति प्रकृयायात निष्कर्षय् थ्यंकाः इलय् हे संविधान च्वयेत पूर्ण प्रतिबद्ध जूगु धयादिसें उकी माओवादी नं ग्वाहालि यायेमाःगु बिचाः प्वंकादिल ।
अथेहे अनमिन प्रमुख ल्यानग्रेनं कपिलवस्तु घटनाय् अनमिनं द्वंकूगु धयादिसें आवंली अज्याःगु ज्या मजुइगु जानकारी बियादीगु खः । कपिलवस्तुइ ल्वाभ सहित प्रहरीं ज्वंपिं माओवादी लडाकूयात अनमिना अधिकारीतय्सं त्वःतुकूगु खः ।
वयेकलं शान्ति प्रकृयायात निष्कर्षय् थ्यंकेत आवश्यक ग्वाहालि यायेत अनमिन तयार जूगु न धयादिल ।
ल्यानग्रेन संयुक्त राष्ट्रसंघीय सुरक्षा परिषदया बैठकय् नेपाःया शान्ति प्रकृयाया बारे जानकारी बीत शुक्रवाः हे उखे पाखे झायादीगु दु ।
