इलय् हे संविधान दयेकेत 'पीस म्याराथुन'
येँ (सन्ध्या टाइम्स)/क्वःछिनातःगु इलय् हे न्हूगु संविधान दयेकेगु निंतिं दवाव बीत थौं सुथय् येँय् पीस म्याराथुन ज्याझ्वः जुल। मदन भण्डारी स्पोर्टस एकेदमिया ग्वसालय् येँया दशरथ रंगशालाय् मुनाः उगु पीस म्याराथुन न्ह्याकूगु खः ।
राष्ट्रपति डा. रामवरण यादवं उलेज्या यानादीगु उगु ज्याझ्वलय् ब्वति कयादीपिं खेलाडीत ब्वाँय् वनाः थापाथली, सिंहदरवार, बागबजार, रत्नपार्क सहिदगेट जुयाः बसन्तपुली मुनेगु ज्या जूगु खःसा र्याली धाःसा दशरथ रंगशालां तप्यंक हे सहिदगेट, न्यूरोड जुयाः वसन्तपुली थ्यंकाः मुनेगु ज्या जूगु खः ।
दशरथ रंगशालांनिसें न्ह्याःगु उगु ज्याझ्वलय् थीथी कासाया कासामिपिं थःपिनिगु कासा म्हितीगु हे वसः पुनाः, एमालेया कार्यकर्ता नापं सर्वसाधारण यानाः सलंसःम्हेस्यां ब्वति काःगु खः। पीस म्याराथुनय् ब्वति कयादीपिं सकलें बसन्तपुली थ्यंकाः छगू समारोहया दथुइ समापन जूगु खः। समापन ज्याझ्वःया मूपाहां संविधानसभाया नायः सुवास नेम्वाङ जुयादीगु खः ।
इलय् हे संविधान निर्माण यायेत संविधानसभाय् दुथ्याःगु थीथी राजनीतिक दल व संविधानसभाया दुजःपिंत दबाव बीगु निंतिं याःगु थौंया पीस म्याराथुन ज्याझ्वःया ग्वसाः खलः मदन भण्डारी स्पोर्टस् एकेदमिया कजि नेकपा (एमाले) या प्रभावशाली नेता केपी शर्मा ओली खः ।
