'संविधान मवःसा सत्ता कब्जा'
येँ (सन्ध्या टाइम्स)/सरकारया प्रवक्ता नापं सूचना तथा संचारमन्त्री शंकर पोखरेलं वइगु जेठ १४ गते न्हूगु संविधान जारी याये मफइगु अवस्थापाखें लबः कायेगु खँयात ध्यानय् तयाः हे एनेकपा(माओवादी) संविधान निर्माणय् गम्भीर मजूगु द्वपं बियादीगु दु ।
प्रेस चौतारी दाङं थौं सुथय् घोराही लागाय् याःगु पत्रकार सम्मेलनय् न्ववासें वय्कलं जेष्ठ १४ गते संविधान जारी मजुल धाःसा आः घोषणा याना तःगु स्वायत्त गणराज्यतय्त हे सक्रिय यानाः माओवादीं सत्ता कब्जाय् कायेगु तयारी यानाच्वंगु दु धयादिल। वर्तमान राजनीतिक गतिरोधया अन्त्य वार्ताया माध्यमं हे यायेमाः धासें वय्कलं सतकं समाधान मालेगु माओवादीया कुतः गुगुं नं हालतय् पू वनी मखु धयादिल। मन्त्री पोखरेलं माओवादीं अनिश्चितकालीन आम हडताल यात धाःसा देय् हानं भिडन्तय् वनीगु ख्याच्वः नं बियादिल। समस्या समाधान मजुयाच्वंगुया मू कारण हे माओवादी खः धासें वय्कलं माओवादीया जनसेना आः तक नं पार्टीया केन्द्र व केन्द्रीय नेतातय्गु हे निर्देशनय् संचालन जुयाच्वंगु कारणं शान्ति सम्झौता कथं सेना समायोजन व ब्यवस्थापनय् पंगः ब्वलनाच्वंगु खः धयादिल ।
सरकारया प्रवक्ता नापं मन्त्री शंकर पोखरेलं माओवादी कार्यकर्तातय्सं दाङ लगायतया थासय् जग्गा कब्जा यानाच्वंगु धइगु हे माओवादीया वास्तविक चरित्र खः धकाः नं द्वपं बियादिल ।
