चोभारया मञ्जुश्री गुफा

येँ (सन्ध्या टाइम्स)/धाथें धाये माल धाःसा येँय् आपालं हे छेँ दयेधुकल। आः ला याउँक न्ह्यइपुकेगु थाय् नं माले थाकुइधुंकल। तर येँ दुनेया हे चोभार तसकं न्ह्यइपुगु पार्क खः। प्राकृतिक सुन्दरताया आनन्द कायेगु व मन याउँकेगु छगू शान्तगु थाय् खः। नापं जलविनायक लागाय् लाःगु मञ्जुश्री गुफां यानाः थ्व पार्क चाःहिउ वइपिंत अझ न्ह्यइपुका बियाच्वंगु दु ।

नेपाः देय् जक मखु थुगु दक्षिण एशिया लागाय् हे ताःहाकःगु मध्ये छगू जुयाच्वंगु उगु गुफाया लम्बाइ १२५० मिटर दु। २०५८ सालय् सिमेन्ट कारखाना बन्द यानाः पलिस्था याःगु उगु पार्कं २०६३ सालंनिसें थुगु गुफा नं सञ्चालन याःगु खँ जलविनायक संस्थाया अध्यक्ष दिनेश महर्जनं कनादीगु दु। अले उगु पार्क पलिस्था यायेत स्थानीय बासिन्दा व थीथी संस्थापाखें ग्वाहालि याःगु खः ।

पार्क चाःहिलेत टिकटया व्यवस्था नं यानातःगु दु। थन पार्क चाःहिलीपिंपाखें दँय्दसं छगू लख व न्याद्वःपाः टिकट बिक्री जुइ। मञ्जुश्री गुफा १२५० मिटर जूसां जलविनायक संस्थां ३२० मिटर तक जक न्यागू रुट चायेकाः दुने मनू चाःहीकेगु ज्या यानाच्वंगु दु ।

उगु गुफा बाघ गुफां शुरु जुइ। आः याकनं हे न्हय्गू रुट खोले यायेत्यनागु खँ सञ्चालक पक्षं धाःगु दु। गुफा दुने थथ्याः क्वथ्याःगु थाय् आपालं दुगुलिं थुकिया आनन्द साहसिक यात्रा कथं जुइ। प्राकृतिक रुपं बने जूगु उगु गुफाय् थीगु पत्थरत खनेदु। गुफा दुने पुखू व थीथी प्वाः नं दुगुलिं गाइड मदयेक दुने चाःहिले धाःसा फइ मखु। गुफा चाःहिलीपिं मनूतय्सं अनं पिहां वयेधुंकाः थःपिंत तसकं आनन्द वःगु खँ धाःगु दु ।