गुलुपाः लिपा मूर्ति दान
येँ (सन्ध्या टाइम्स)/देश विदेशया थीथी विहारय् गुलुपाः दान यानादीम्ह भाजु जीवरत्न स्थापितं आः बुद्धया मूर्ति नं दान बीगु शुरु यानादीगु दु। वय्कलं छुं ई न्ह्यः तिनि सिम्लेया छोइ खोर्लिङ्ग गुम्बायात मूर्ति लःल्हानादीगु खः। लिसें आः नकतिनि अन्तर्राष्ट्रिय बौद्ध भावना केन्द्र लाकुरे भञ्ज्यांगया डाँडाय् च्वंगु ध्यान केन्द्रयात नं वय्कलं छगू बुद्ध मूर्ति दान यानादीगु दु। वय्कलं थ्व निगुलिं थासय् ३ फिट तजाःम्ह बुद्ध मूर्ति दान यानादीगु खःसा आः मेमेगु थासय् नं दान यायेगु ग्वसाः दयेकादीगु दु। झिक्वःगु बौद्ध सम्मेलनया झ्वलय् वय्कलं धर्मोदय सभा लुम्बिनी व कोरियन विहारयात छगः छगः गुलुपाः दान यानादीगु खः ।
