खाडीइ द्यंगु द्यनं सीपिं अप्वः
ध्यबा कमे यायेगु म्हगस ज्वनाः खाडी देशय् ज्या याः वनीपिं नेपाःमित थगुने जक न्यासःम्ह सीगु खँ सीदुगु दु । उकी मध्यय् छुं मनूतय् लाश नेपाः लिहां वइसा गुलिसियां लाश अन हे थुना छ्वइ ।
सूत्रतय्सं बिउगु जानकारी कथं खाडीया कतार साउदी अरब व संयुक्त अरब इमिरेट्सय् अप्वः धइथें नेपाःमित ह्दयाघात जुयाः सीगु जुयाच्वंगु दु । उपिं अप्वः यानाः द्यंगु द्यनं तुं जुयाः सीगु खः । थौं बहनी द्यंवंम्ह मनू कन्हय् सुथय् जुइबलय् सिनाच्वनेधुंकी । उपिं छु जुयाः सीगु धकाः सी दइ मखु अस्पतालं उपिं सीगुया कारण 'हार्ट एटेक' धकाः च्वया बी । थगुने सीपिं न्यासःम्ह मध्यय् निसःत्या स्वयाः अप्वः थथे हे यानाः सीगु खः ।
थ्व बोहक मेपिं नेपाःमित गाडी दुर्घटनाय् लानाः तजाःगु थासं कुतुं वयाः थीथी कथंया मेशिनरीइ लानाः सीगु जुयाच्वंगु दु ।
खाडी लागाय् नेपाःमित सीबलय् थीथी कथंया समस्यात नं वयेयः । गथे कि पोष्टमार्टम पासपोर्ट भिसा अन्तिम संस्कार आदि । थुकिं यानाः सीपिं अप्वः धइथें नेपाःमितय् लाश पोष्टमार्टम तकं मयासे थुनेगु वा उइगु ज्या नं जुयाच्वंगु दु ।
अन सीपिं नेपाःमितय् सम्पूर्ण भ्वं आदि मिले यानाः नेपाः छ्वया हयेबलय् लत्या धइथें ई मालीगु जुयाच्वंगु दु । लिसें खर्च नं अप्वइगुलिं अन हे अन्तिम संस्कार यानाच्वंगु दु ।
