थौं मसाल जुलुस, कन्हय् नेपाल बन्द
येँ (सन्ध्या टाइम्स)/आदिवासी जनजाति खलः पुचःया मंकाःगु मोर्चा आदिवासी जनजाति वृहत्त मोर्चा, नेपालं थौं बहनी येँ लगायत देय्न्यंकं मसाल जुलुस पिकयाः कन्हय्या नेपाल बन्द ताःलाकेत आह्वान याइगु जूगु दु ।
आत्मनिर्णयया अधिकार, जातीय स्वायत्तता नापं स्वशासन व आदिवासी जनजातिया थीथी अधिकारयात न्हूगु संविधानय् सुनिश्चित यायेमाः धकाः माग यानाः कन्हय् नेपाल बन्द यायेगु ग्वसाः ग्वःगु खःसा येँया शान्ति वाटिका लागां थौं बहनी ५ बजे मसाल जुलुस पिकयाः येँया थाय्थासय् चाःहिलीगु ज्याझ्वः दयेकातःगु दु ।
बन्द आह्वानकर्तातय्सं छुं दिं न्ह्यवंनिसें हे प्रचार प्रसार यायेगु झ्वलय् माइकिङ यायेगु नापं अंगलय् च्वयेगु व पर्चा इनेगु ज्या याना वयाच्वंगु दु ।
नेपाःया आदिवासी जनजातितय्गु न्यय्गुलिं मल्याक खलः पुचः नापं जातीय सवालयात कयाः सः तया वयाच्वंगु थीथी राजनीतिक पार्टी नापनापं राजनीतिक दलया जातीय मोर्चात तकं दुथ्याकाः उगु मोर्चा नीस्वंगु खःसा उगु मोर्चां छुं दिं न्ह्यवंनिसें हे आन्दोलन याना वयाच्वंगु खः ।
आदिवासी जनजाति वृहत्त मोर्चां कन्हय्या नेपाल बन्द ज्याझ्वः लिपा नं संविधानसभा व राजनीतिक दलत आदिवासी जनजातिया सवालयात कयाः संविधानय् च्वयेत तयार मजुल धाःसा अनं लिपा निगूगु चरणया आन्दोलन न्ह्याकेगु जुइ धकाः ख्याच्वः बिउगु दु ।
