चीनं नेपालय् लगानी अप्वयेकीगु
येँ (सन्ध्या टाइम्स)/चीनं नेपालय् थःगु लगानी अप्वयेकीगु जूगु दु। चीनया औपचारिक भ्रमणय् वनाच्वंम्ह प्रधानमन्त्री माधवकुमार नेपाल व चिनिया राष्ट्रपति हु जिन्तोओ दथुइ जूगु खँल्हाबल्हा लिपा चीनं नेपालय् लगानी अप्वयेके निंतिं सहलह जूगु नेपाली अधिकारीतय्सं धाःगु दु ।
उगु इलय् प्रधानमन्त्री नेपालं निगू देय्या दथुइ तःदँ न्ह्यः निसें कायम जुया वयाच्वंगु सामाजित, आर्थिक व सांस्कृतिक लगायतया सम्बन्धया बारे नं थप सहलह जूगु खः ।
प्रधानमन्त्री नेपालं न्हूगु संविधान जारी जुयाः राजनीतिक स्थिरता कायम जुलकि नेपाःया आर्थिक विकासय् अन्तर्राष्ट्रिय क्षेत्रया ग्वाहालि व सदभावया आवश्यकता दइगु धासें उकिया निंतिं चिनिया ग्वाहालिया निंतिं अपेक्षा यानादीगु खः ।
उगु इलय् प्रम नेपालं शान्ति व स्थिरताया नापं नेपाःया भौतिक पुर्वाधारया निर्माण, पर्यटन क्षेत्रया प्रवर्द्धन, जलविद्युत व कृषि क्षेत्रया विकासया निंतिं नेपाःया आन्तरिक स्रोत पर्याप्त मजूगु धासें प्राथमिकताया लिधंसाय् तयाः आर्थिक क्षेत्रया विकासया निंतिं स्रोतसाधन लगायत प्रविधिया क्षेत्रय् नं ग्वाहालि यायेत चीनयात इनाप यानादीगु खः ।
