थौं चायागु थलबल तछ्याइगु

थौं मिला पुन्हि। थौं ख्वपयाम्ह चाँगुनारायण द्यः येँय् हइ। चाँगुनारायण येँय् हइबलय् थन थीथी थासय् पुलांगु चायागु थबलबल लँय् हयाः तछ्याइगु अजूचायापुगु परम्परा दु। थौंकन्हय् थ्व चलन मदयेधुंकूसां थनया हनुमानध्वाखा छथाय् धाःसा स्थानीय तारीणी मखन क्लबया ग्वसालय् छुं दँ न्ह्यःनिसें थ्व चलन सञ्चालन याना वयाच्वंगु दु।
चाँगुनारायण जात्रा व चाया थलबल तछ्यायेगु स्वनिगःया पुलांगु संस्कृति खः। थ्व प्रचलन लिच्छबी जुजु मानदेवया पालंनिसें हे न्ह्याना वयाच्वंगु खः धइगु धापू दु ।

चाँगुनारायणं हयाः येँया हनुमानध्वाखा लाय्कुली द्यः बिज्याकीगु पुलांगु चलन खः। थुबलय् चाँगुनारायण द्यःयात अपशकुन क्यनेगु धकाः जमलंनिसें हे थाय्थासय् पुलांगु चायागु थलबल तछ्यायेगु याइ। चाँगुनारायण द्यः जमलय् थ्यंके हयेवं गुर्जु पल्टन सहित बाजं थानाः कमलाछि, असं, केलत्वाः, वंघः, मखं जुयाः हनुमानध्वाखा हयाः तलेजु देगलय् यंकीगु खः ।

थथे चाँगुनारायण हइबलय् हनुमानध्वाखा न्ह्यःने च्वंगु मखं महाद्यःया न्ह्यःने चायागु थलबल तँतँ यानाः तया तइ। अले उकिया क्वय् मि नं च्याका तइ। चाँगुनारायण न्ह्यःने थ्यनेवं कथिं दायाः उगु थलबल तछ्यायेगु शुरु याइ ।

चाँगुनारायण वइगु फुक्क हे लागाय् न्हापा थथे याइगु खः। तर वंगु २० दँ न्ह्यवंनिसें थ्व चलन मदया वन। आः स्थानीय मनूत जानाः हनुमानध्वाखा छथाय् हानं शुरु याःगु दु।
चाँगुनारायण हनुमानध्वाखाय् थ्यनेवं जीवित द्यः कुमारी माजुयात नं अन बिज्याकी। अले स्वंगः कलश तयाः राजोपाध्यायपाखें पुजा जुइ। चाँगुनारायणयात माःताः ज्वंकाः सिंह ध्वाखां दुने यंकाः त्रिशुल व इनार चोकया दथुइ च्वंगु धातुयागु सिंहासनय् नारायण द्यः बिज्याकी। अनंलि वैदिक पुजा शुरु जुइ। मूचुकय् होम याइ। होमय् च्याकूगु थ्व मि अबलय् चाँगुं तकं खनेदु धाइगु चलन दु। लिपा कलशय् जल भद्रमति, भचाखुसि, शोभाभगवतिइ यंकाः चुइकी। देशय् वयेधुंकूम्ह चाँगुनारायण हानं लिहां वन कि देशय् मभिं जुइ उकिं वसपोलयात लँय् चायागु थलबल तछ्यानाः अल्छिन क्यन कि वसपोल लिहां वनी मखु धइगु विश्वासं थथे चायागु थलबल तछ्याःगु खः धइगु नं धापू दु।
थ्व ज्याझ्वः थौं सनिलया ४ बजे हनुमानध्वाखाय् याइगु जूगु दु ।