महाशक्ति चीनपाखें फक्व ग्वाहालि कायेमाः

प्रधानमन्त्री माधव नेपाल झीगु मेगु जःलाखःला देय् चीनया भ्रमणय् दी। नेपालय् न्ह्याम्ह प्रधानमन्त्री जूसां निगू तःधंगु जःलाखःला देय् चीन व भारत भ्रमण यानाः भिंतुना कायेगु चलन दु। वहे चलन कथं प्रम नेपालं भारतया भ्रमण यानादीधुंकूगु दुसा आः चीनया औपचारिक भ्रमण शुरु यानादीगु खः ।

थौंकन्हय् चीन विश्वया हे दकलय् अप्वः आर्थिक विकास जुयाच्वंगु देय् खः। थुकियात भविष्यया महाशक्ति कथं चित्रित यानाः स्वयेगु यानाच्वंगु दु। थज्याःगु महाशक्ति देय् नेपाःया जःलाखःला जुयाच्वंगु झीगु शौभाग्य खःसा अज्याःगु महाशक्तिपाखें नं माक्व लबः कयाः थःगु देय्या विकास याये मफुगु धाःसा झीगु दुर्भाग्य खः। खास यानाः भारत तम्वइ धइगु ग्याःचिकु दुगु कारणं नेपालं चीनपाखें माक्व सहयोग काये फयाच्वंगु मदु। भारतं नेपाःयात चीनलिसे सतिके नं मबीगु व थम्हं नं माक्व ग्वाहालि मबीगु कारणं थौं नेपाः चीन थेंज्याःगु महाशक्तिया जःलाखःला खयां नं अर्थहिन जुयाच्वंगु दु ।

अथे खःसां थौंया अति विकसित अवस्थाय् चीन स्वयां कोशौं तापाःगु अमेरिका थेंज्याःगु देय् ला प्रभावित मजुसे च्वने मफु धाःसा नेपाः थेंज्याःगु चीनया सीमालिसे हे स्वाःगु देय् वपाखें बिस्कं च्वने फइगु स्थिति हे मदु। यदि च्वनेगु कुतः यात धाःसा उकिं झीत हे विश्वया विकासक्रमपाखें तापाका बीगु निश्चित दु। आः नेपाःया प्रधानमन्त्रीपाखें चीनया भ्रमण जुयाच्वंगु दु। वय्कलं कम से कम नं नेपाःयात विश्वय् वयाच्वंगु आर्थिक विकासया लँपुइ न्ह्याके बीगु निंतिं चीनया फक्व अप्वः ग्वाहालि कायेगु वातावरणया लुखा चायेका थकेमाः। थुकी हे वय्कःया भ्रमणया सफलता सुलाच्वंगु दु ।