एमालेया युवा संघय् ओलीं क्यन सरकारी शक्ति
येँ (सन्ध्या टाइम्स)/एमाले समर्थित युवा संघ नेपालया नेतृत्वया लागिं जूगु चुनावय् पार्टीया ओली पक्ष व संस्थापन पक्ष दथुइ मत ल्याः खानाच्वँच्वं हे विवाद ब्वलंगु दु। सिराहाया लहानय् जूगु उगु सम्मेलनय् मत ल्याः खानाः ओली पक्षया महेश बस्नेत त्याइगु अवस्थाय् थ्यंकाः अथे विवाद ब्वलंगु खः। ओली पक्षधरं गृहमन्त्री भीम रावलया स्वकीय सचिव झपट रावल व प्रधानमन्त्रीया भिन्चा नितिष पौडेलया पुचः हे दुकयाः धाँधली यात धकाः संस्थापन पक्षया इन्द्रलाल सापकोटां द्वपं बिउगु दु। अथे हे ओली पक्षं संस्थापन पक्षयात वाइसिएल धकाः आक्रमण तकं याःगु खँ सीदुगु दु ।
मत ल्याः खायेगु झ्वलय् लिपांगु लिच्वः कथं नायः पदया निंतिं उम्मेदवार जुयादीम्ह महेश बस्नेतं ४८४ मत कायेधुंकूगु दुसा सापकोटां ३९९ मत कायेधुंकूगु दु। निर्वाचनय् मुक्कं यानाः १,३५३ मत कुतुंवंगु खः। चुनावय् नायः पदया निंतिं नापं ८३ पदय् १८७ म्ह उम्मेदवार जूगु खःसा उकी मध्ये १६ म्ह निर्विरोध निर्वाचित जुइधुंकूगु दु ।
