संविधान च्वइपिंत नेवाः अवधारणा
येँ (सन्ध्या टाइम्स)/जनस्तरं नेवाः स्वायत्त राज्य घोषणा यायेधुंकाः नेवाः ख्यःया न्ह्यलुवात थौं संविधानसभाया राज्य पुनर्संरचना नापं राज्य शक्ति बाँडफाड समितिइ डेलिगेशन वनाः थःपिंसं घोषणा यानागु नेवाः स्वायत्त राज्यया अवधारणा उगु समितिया सभापति लोकेन्द्र बिष्ट मगरयात लःल्हात ।
वंगु शनिवाः नेवाः स्वायत्त राज्य घोषणा ज्याझ्वलय् न्ह्यब्वःगु नेवाः स्वायत्त राज्यया राजनीतिक अवधारणा, नेवाः स्वायत्त राज्य दुने भाषा, शिक्षा, समावेशी, आर्थिक, सांस्कृतिक अवधारणायात हे नेवाःतय्गु अवधारणा खः धकाः न्ह्यथँसें उगु समितिं माःगु कथं ज्या न्ह्याकेत इनाप यायेत मंकाः संघर्ष समितिया दुजः नापं नेवाः आन्दोलनया न्ह्यलुवापिं अथे डेलिगेशन वंगु खः ।
अवधारणा लःल्हाना कासें समितिया सभापति लोकेन्द्र बिष्ट मगरं नेवाःतय्गु उगु खँ मुँज्याय् तयेगु बचं बियादीगु दु।
डेलिगेशनया झ्वलय् मंकाः संघर्ष समितिया दुजः मल्ल के सुन्दरं ऐतिहासिक नेपालमण्डल दुनेया नेवाः बाहुल्यता दुगु नगर व गां नेवाः राज्य दुने तयेमाःगु नापं छुं नं राज्यया घेरा दुने लाःगु नेवाः राज्य थःपिंसं स्वीकार याये फइ मखु धकाः धयादीगु खः ।
