कार्यकर्ता स्याःगुलिं धादिङ बन्द

येँ (सन्ध्या टाइम्स)/ धादिङया दार्खा गाविसय् थः कार्यकर्तायात गोलीं कयेकाः स्याना बिउगु घटनाया विरोधय् एनेकपा (माओवादीं) थौं धादिङ जिल्ला बन्द याःगु दु।
बन्द आह्वानं यानाः थौं सुथंनिसें हे सदरमुकामय धादिङवेशीइ सवारी साधन, पसः शिक्षण संस्था बन्द जूगु दुसा थुकिं यानाः जनजीवन प्रभावित जूगु दु। स्थानीय माओवादी कार्यकर्ता सन्तबहादुर तामाङयात एमालेया युथफोर्स कार्यकर्ता विक्रम धाइम्ह बलबहादुर तामाङं म्हिगः सनिलय् न्हकुइ गोलीं कयेकाः स्याना बिउगु द्वपं माओवादीं बिउगु दु।
दोषीयात कारवाही याये माःगु नापं क्षतिपूर्तिया माग यानाः उगु कथं थौं धादिङ बन्दया आह्वान यानाः थौं सुथंनिसें हे माओवादी कार्यकर्तातय्सं विरोध प्रदर्शन याःगु खः। बन्द जूगु कारणं येँनं धादिङ जुयाः स्वनिगलं पिने वनेगु व स्वनिगलय् वइगु गाडी नं प्रभावित जूगु दु ।